Komiteti për Punët e Jashtme i Parlamentit Evropian zhvilloi një vizitë dyditore në Tiranë, më 16–18 shkurt, ku theksi kryesor u vendos te ecuria e procesit të integrimit dhe nevoja për forcimin e dialogut politik në vend.
Kryetari i komitetit, David McAllister, pas takimeve me kryeministrin Edi Rama, me kryetaren e Kuvendit Elisa Spiropali, me përfaqësues të mazhorancës dhe opozitës, si dhe me ambasadorë të vendeve anëtare të BE-së, dha një mesazh të qartë për klasën politike shqiptare.
“Ne e mbështesim rrugëtimin e Shqipërisë drejt BE-së dhe vlerësojmë arritjet e deritanishme, përfshirë hapjen e grupkapitujve të negociatave. Megjithatë, procesi i zgjerimit bazohet në meritë dhe në përmbushjen e kritereve. Ka ende shumë punë për t’u bërë, veçanërisht në zbatimin e reformave dhe përafrimin e legjislacionit me atë të BE-së,” u shpreh McAllister.
Ai theksoi se integrimi evropian duhet të mbetet prioritet i përbashkët për të gjitha forcat politike në Shqipëri, duke shprehur shqetësim për nivelin e lartë të polarizimit politik.
“Vlerësojmë se integrimi evropian është prioritet për çdo parti politike në Shqipëri, por jemi të shqetësuar për polarizimin politik në vend. Duhet të ketë më shumë stabilitet dhe dialog politik. Shumica duhet të angazhojë dhe të afrojë në dialog opozitën, ndërsa opozita duhet të përfshihet më shumë në këtë dialog. Mendojmë se protestat e dhunshme nuk kanë vend në një demokraci funksionale. Ka ende shumë për t’u bërë për përafrimin e legjislacionit shqiptar me atë të BE-së dhe për zbatimin efektiv të këtij legjislacioni,” theksoi ai.
