Ekziston një “shpresë e vogël” për të rikuperuar bizhuteritë e vjedhura me vlerë 102 milionë euro nga Muzeu i Luvrit më 19 tetor.
Prokurorja e Parisit, Laure Beccuau, e cila po drejton hetimin, u shpreh kështu për Ouest-France të enjten, 23 tetor:
“Publikimi i kësaj grabitjeje të organizuar më jep një shpresë të vogël që autorët nuk do të guxojnë të lëvizin shumë me bizhuteritë dhe ne mund t’i gjejmë nëse veprojmë shpejt”, tha Beccuau.
Grabitja e guximshme
Katër hajdutët arritën të vjedhin tetë bizhuteri të Napoleoni-t duke u maskuar si punëtorë ndërtimi dhe duke përdorur një shkallë mekanike për të hyrë në muze përmes ballkonit.
Rreth orës 9:30 të mëngjesit të së dielës, 19 tetor, 30 minuta pas hapjes së muzeut, hajdutët u futën në Galerinë Apollon, ku ruhen bizhuteritë mbretërore. Ata morën në dorë nëntë objekte, përfshirë disa bizhu të Perandoreshës Eugénie, por iu shpëtoi kurora e saj mbretërore, duke u larguar me tetë pjesë.
Kalimtarët filmuan grupin e hajdutëve duke dalë nga muzeu vetëm 7 minuta pas hyrjes, më pas hajdutët u larguan me motoçikleta. Ata tentuan të shkatërronin pajisjet, por dështuan.
Hetimet
Beccuau shpjegoi se hetuesit kanë mbledhur mbi 150 mostra ADN-je, si dhe kanë sekuestruar pajisjet e braktisura të grabitësve, përfshirë kaska, jelekë dhe doreza, të cilat po analizohen për gjurmë gishtash.
Një ekip prej rreth 100 hetuesish ka marrë gjithashtu pamje të shumta nga kamerat e sigurisë të ndërtesave përreth, të cilat po përdoren për të ndjekur rrugën e ikjes së hajdutëve. Megjithatë, Galeria Apollon nuk kishte kamera sigurie gjatë grabitjes.
Luvri ka deklaruar se sistemet ekzistuese të sigurisë funksionuan normalisht, duke përfshirë alarmin që u aktivizua kur hajdutët hynë në galeri..
Drejtori i Luvrit, Laurence Des Cars, për të cilin aludohet se mund të japë dorëheqjen, e quajti grabitjen një “dështim të tmerrshëm” për muzeun. Pas incidentit muzeu u mbyll, por u rihap më 22 tetor. Prokurorja Beccuau tha se hetuesit po veprojnë shumë shpejt, nga frika që bizhuteritë, mund të shkatërrohen ose shiten si gurë të veçantë.
“Duam të arrestojmë autorët sa më shpejt që të jetë e mundur për të rikuperuar bizhuteritë para se gurët të ndahen. Po hetojmë edhe për përfshirjen e mundshme të stafit të muzeut”, tha Beccuau.
Hetimi tregon shenjat e një organizimi të kujdesshëm, duke përfshirë përgatitjen, guximin në operacion, llojin e bizhuterive të synuara dhe mënyrën e arratisjes.
