Kreu i Partisë Demokratike, Lulzim Basha, ka nënvizuar rëndësinë e rritjes së testimeve në mbledhjen e dytë të Këshillit të Sigurisë Kombëtare të thirrur nga presidenti Meta lidhur me menaxhimin e situatës së krijuar nga COVID 19.
“Në mbledhjen e KSK detajova arsyet, nevojën dhe përfitimet që kanë qytetarët nga rritja e testimeve”, shkruan Basha.
Kryedemokrati nënvizon gjithashtu se i kërkoi qeverisë mbështetjen për familjet në nevojë dhe bizneset në këto kohë të vështira.
“Njerëzit duan garanci për jetën, shëndetin dhe mirëqenien e tyre. Ky është angazhimi im dhe i opozitës. Gjithë energjitë dhe resurset e qeverisë duhet të shkojnë për të lehtësuar krizën dhe jo për sulme politike, sepse sot shqiptarët e papunë dhe në vështirësi ekonomike, kanë nevojë për mbështetje të menjëhershme”, thotë Basha.
Pas mbledhjes, kryeminsitri Rama tha se mbledhja e Këshillit ishte e gjatë por e dobishme e dhe një shkëmbim i hapur opinionesh me Presidentin e Republikës dhe kryetarin e PD për hapjen graduale të aktivitetit në javët në vijim.
“Sikur komunikimi publik të ishte kaq pozitiv, politika do ishte shumë ndryshe”, u shpreh Rama. /e.s/
