Kosova ka shënuar rritje të numrit të vizitorëve gjatë muajit qershor 2026, me një shtim të dukshëm të turistëve të huaj. Prishtina vazhdon të jetë destinacioni më i vizituar, ndërsa pas saj renditen Prizreni dhe Peja. Sa u përket vizitorëve të huaj, numri më i madh vjen nga Shqipëria, Gjermania, Turqia dhe Zvicra.
Sipas të dhënave të Agjencisë së Statistikave të Kosovës, gjatë qershorit 2026 vendin e vizituan gjithsej 70.234 persona. Prej tyre, 28.638 ishin vizitorë vendorë, ndërsa 41.596 vizitorë të huaj.
Krahasuar me qershorin e vitit 2025, kur u regjistruan 63.502 vizitorë, numri i përgjithshëm është rritur me 10,6%.
Rritja është më e theksuar te vizitorët vendorë, numri i të cilëve është shtuar me 19,6% në raport me të njëjtën periudhë të një viti më parë. Ndërkohë, numri i vizitorëve të huaj është rritur me 5,2%.
Statistikat tregojnë se Prishtina mbetet rajoni me numrin më të madh të vizitorëve, e ndjekur nga Prizreni dhe Peja. Kryeqyteti vazhdon të jetë pika kryesore e vizitorëve të huaj, ndërsa Prizreni dhe Peja mbeten ndër destinacionet më të frekuentuara falë trashëgimisë së tyre kulturore, qyteteve historike dhe zonave malore turistike.
Kjo prirje është vërejtur edhe gjatë muajve të mëparshëm, me Prishtinën që kryeson vazhdimisht për numrin e vizitorëve, ndërsa Prizreni dhe Peja renditen menjëherë pas saj.
Sa u përket turistëve të huaj, Shqipëria vazhdon të jetë burimi kryesor i vizitorëve në Kosovë. Gjatë qershorit 2026, nga Shqipëria u regjistruan 7.628 vizitorë, ose 13% më shumë krahasuar me të njëjtin muaj të vitit të kaluar.
Sipas raportit të Agjencisë së Statistikave të Kosovës, në qershor 2026 u regjistruan gjithsej 41.596 vizitorë të huaj, me rritje prej 5,2% në krahasim me qershorin 2025. Numri më i madh i tyre ishte nga Shqipëria, Gjermania, Turqia dhe Zvicra.
Pas Shqipërisë renditet Gjermania me 4.300 vizitorë, megjithëse ky treg ka shënuar një rënie të lehtë prej 1,5%.
Turqia renditet e treta, duke regjistruar rritjen më të madhe. Gjatë qershorit, Kosovën e vizituan 3.979 turistë nga Turqia, ose 36,4% më shumë se një vit më parë.
Nga Zvicra u regjistruan 3.121 vizitorë, me një rritje prej 2%, ndërsa nga vendet e tjera erdhën 22.568 vizitorë, ose 0,5% më shumë krahasuar me qershorin e vitit 2025.
Rritja e turizmit pasqyrohet edhe në numrin e net-qëndrimeve. Gjatë qershorit 2026 u regjistruan gjithsej 163.739 net-qëndrime, nga të cilat 85.783 u realizuan nga vizitorët e huaj dhe 77.956 nga vizitorët vendorë.
Vetëm te vizitorët e huaj, net-qëndrimet u rritën me 13% krahasuar me qershorin e vitit të kaluar.
Rritjen më të madhe e shënuan vizitorët nga Turqia, të cilët realizuan 7.989 net-qëndrime, ose 72,1% më shumë se në qershor 2025.
Edhe vizitorët nga Shqipëria qëndruan më gjatë në Kosovë, duke regjistruar 16.644 net-qëndrime, me një rritje prej 41,9%.
Ndërkohë, vizitorët nga Gjermania realizuan 8.206 net-qëndrime, ndërsa ata nga Zvicra 5.143, me rritje përkatësisht prej 5,5% dhe 7,3%.
/Marrë nga Monitor
