58.158 është sasia e fletëve të votimit që do të prodhohen për zgjedhjet e pjesshme për kryetar të bashkisë Dibër, që do të mbahen më 11 shtator.

Vendimi i miratuar të martën nga KQZ përcakton sasinë e fletëve të votimit që do të përdoret në procesin e afërt elektoral, e cila do t’i dërgohet Komisionit Zonal të Administrimit Zgjedhor, për t’iu shpërndarë më pas 118 qendrave të votimi që ka kjo zonë elektorale.

Dispozitat e kodit elektoral që bëjnë fjalë për përgatitjen e dokumentacionit zgjedhor dhe dërgimin e materialeve zgjedhore, përcaktojnë që sasia e fletëve të votimit është e barabartë me numrin e zgjedhësve, duke i shtuar 2%.

Sipas të dhënave të përcjella nga Drejtoria e Përgjithshme e Gjendjes Civile, numri i zgjedhësve në këtë zonë zgjedhore rezulton me 57.018 zgjedhës, ndërsa në total do të prodhohen 58.158 fletë votimi. / r.a