Prokuroria e Beratit ka urdhëruar arrestimin e tre personave për një skandal ushqimor që përfshin mbi 21,000 kg mandarina të kontaminuara me pesticide të ndaluara. Të ndaluarit janë fermeri E.T., grumbulluesi A.D. dhe inspektori E.T., të akuzuar për “shpërdorim detyre,” “shkelje të rregullave për lëndët helmuese,” “prodhim dhe shitje të ushqimeve të rrezikshme për jetën e njerëzve” dhe “mashtrim me produktet ushqimore”, sipas Kodit Penal.
Hetimet nisën pas një kallëzimi të Autoritetit Kombëtar të Ushqimit (AKU), pasi autoritetet kroate refuzuan importin e një sasie prej 21,593 kg mandarina të dyshuara për ndotje me pesticidin Fosmet, një substancë toksike e ndaluar që nga viti 2022. Analizat treguan se frutat përmbanin mbetje të pesticideve mbi normën e lejuar, duke përbërë rrezik serioz për shëndetin publik.
Sipas prokurorisë, mandarinat e kthyer nga Kroacia nuk u asgjësuan në mënyrë të rregullt. Fermeri E.T. pretendoi se i kishte hedhur në një landfill në Bashkinë Dimal, por inspektimet nuk gjetën asnjë mbetje të produktit.
Inspektori E.T., përgjegjës për certifikatat fitosanitare, pranoi se në raste të mëparshme kishte dërguar certifikata bosh te subjektet eksportuese, të cilat i plotësonin vetë dhe ia dërgonin më pas me foto për regjistrim në bazën e të dhënave. Kjo praktikë tregon mungesë kontrolli mbi sigurinë ushqimore dhe rrit dyshimet për abuzime të tjera.
Njoftimi i prokurorisë:
Dyshime për hedhjen në treg të mbi 21.000 kg mandarina me pesticide, arrestohen me kërkesë të prokurorisë Berat fermeri, grumbulluesi dhe inspektori
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Berat, u arrestuan shtetasit E.T., A.D. dhe E.T. për veprat penale të ‘Shpërdorimit të Detyrës’, ‘Shkelje të rregullave për lëndët helmuese‘, ‘Prodhim dhe shitje të ushqimeve dhe lëndëve të rrezikshme për shëndetin apo jetën e njerëzve‘ dhe ‘Mashtrim me produktet ushqimore‘ të parashikuara nga nenet 281, 288 dhe 288/c të K. Penal.
Nga hetimet në kuadër të procedimit penal nr.768 mbi bazën e kallëzimit të bërë nga Autoriteti Kombëtar të Ushqimit, Drejtoria e Përgjithshme Tiranë pas refuzimit në Kroaci të 21593 kg mandarina klementine të dyshuara me pesticide fosmet, rezultoi se produkti është blerë nga fermerët e qarkut Berat dhe Sarandë.
Nga analizat, u konstatua se tek kjo sasi mandarinash kishte mbetje pesticidi “Fosmet” mbi normën e lejuar (0.075 mg/kg -vlera elejuar ≤ 0.01 mg/kg). Në një kohë kur ky pesticid është hequr nga përdorimi nga viti 2022 dhe nuk lejohet të përdoret. Konsumimi i një fruti që përmban mbetje të fosmetit mbi nivelet e lejuara mund të sjellë pasoja për shëndetin e njeriut, veçanërisht nëse ekspozimi është i përsëritur, pasi fosmeti është një kimikat toksik.
Nga hetimet rezultoi se procedura e kthimit të produktit të pasigurt, është bërë pa dijeninë e AKU dhe fermeri E.T. tha se ka asgjësuar produktin e kthyer nga operatori i biznesit ushqimor në një vend të paidentifikuar. Vetë fermeri pretendoi se e kishte hedhur mallin në landfillin e Bashkisë Dimal ku ndërkohë nga këqyrja rezultoi se nuk kishte asnjë mbetje produkti. Gjithashtu në deklarimin e dhënë në AKU sipas procesverbalit të konstatimit rezulton të ketë deklaruar se e ka hedhur mallin në kanale të rastësishme.
Ndërkohë, punonjësi i DRVMB Berat inspektori E.T., në lidhje me këtë rast, ka deklaruar se punon prej 5-vitesh në këtë pozicion dhe ka për detyrë të monitorjë bimët dhe të lëshojë certifikatat fito sanitare. Ai deklaroi se ka shkuar tek fermeri pas ngritjes së grupit të punës dhe se mostrat i ka marë në pemë tek fermeri. Por duke qënë se është personi përgjegjës i cili certifikon mallrat për eksport, ka deklaruar se ka pasur raste që i dërgonte bosh certifikatat tek subjekti dhe vetë subjeti i plotësonte dhe ja dërgonte të plotësuara me foto dhe ai më pas i regjistronte në databasën e DRVMB.
Hetimet vijojnë në bashkëpunim edhe me AKU tiranë për të nxjerrë përgjegjësitë nga punonjësit e DRAKU&DRVMB Berat.
