Përafërsisht 10,749 civilë janë vrarë dhe 15,599 të tjerë janë plagosur në Ukrainë që kur Rusia pushtoi vendin në shkurt të vitit të kaluar.
Sipas autoriteteve ukrainase numri i viktimave përfshin 499 fëmijë. Në një intervistë me agjencinë e lajmeve Interfax-Ukrainë Yuriy Belousov, kreu i Departamentit të Krimeve të Luftës të Prokurorisë së Përgjithshme të Ukrainës, tha se “pasi të çlirohen territoret e okupuara të Ukrainës, numri i të vrarëve pritet të “rritet shumë herë”.
“Unë mendoj se do të ketë dhjetëra mijëra të vdekur vetëm në Mariupol. Shifrat e Prokurorisë së Përgjithshme janë të ngjashme me ato të organizatave ndërkombëtare si Kombet e Bashkuara, ” tha Belousov.
Më 7 korrik, OKB-ja raportoi se kishte konfirmuar vdekjen e “më shumë se 9,000 civilëve, duke përfshirë mbi 500 fëmijë”, por numri real pritet të jetë më i lartë.
Belousov tha gjithashtu se ekipi i tij kishte regjistruar 98,000 krime lufte të kryera nga forcat ruse në Ukrainë gjatë pushtimit.
Ndërkaq forcat e mbrojtjes ajrore ukrainase kanë shkatërruar pothuajse 15 dronë kamikaze të tipit Shahed gjatë një sulmi rus në Kiev. Kjo u raportua nga kreu i administratës ushtarake të kryeqytetit, Serhiy Popka.
/a.r
