Trupi i pajetë i 22 vjeçarit shqiptar që u qëllua pak ditë më parë nga pensionisti italian në qytetin e Milanos, ka mbërritur këtë pasdite në Shqipëri. Viktima, Gjergj Gjoni, u vra pranë vilës së pensionistit 75 vjeçar për shkak se ky i fundit dyshoi se i riu po tentonte të vidhte. Sipas ekspertizës mjekoligjore italiane, i riu humbi jetën për shkak të një plumbi që kishte marrë në gjoks.
Në Itali kjo ngjarje mori një vëmendje të madhe mediatike, ku fokusi shkoi tek pensionisti dhe nëse në Itali shtetasit duhet të mbajnë armë për qëllime vetëmbrojtjeje.
Sipas medias italiane, pensionisti i cili u akuzua nga hetuesit për vrasje, me shumë gjasa pritet që të lirohet nga akuza. Sakaq, avokati i familjes së të ndjerit, ka kërkuar që pensionistit ti bëhet një test psikologjik për të parë nëse vuan nga ndonjë çrregullim mendor, kjo pas deklaratave kontradiktore të tij në lidhje me dinamikën e ngjarjeve që sollën dhe humbjen e jetës së të riut.
Ceremonia mortore për 22 vjeçarin nga Puka do të zhvillohet të shtunën në orën 10: 00 pranë familjes së të ndjerit.
