Deputetja e Partisë Demokratike, Ina Zhupa, ka sulmuar mazhorancën gjatë Konferencës së Kryetarëve, duke e akuzuar për shkelje të hapur të të drejtave të opozitës dhe për kthimin e Kuvendit në një institucion pa rol real vendimmarrës.
Zhupa ironizoi deklaratat e mazhorancës se sesioni i kaluar parlamentar kishte qenë i suksesshëm dhe kishte garantuar hapësirë për opozitën. Sipas saj, shifrat e përmendura nga Taulant Balla, se opozita ka folur 48 orë dhe mazhoranca 40 orë, janë tregues se mazhoranca ka qenë e detyruar të heshtë. “Edi Rama ju trajtoi si kartona dhe ushtarë pa personalitet, duke ju urdhëruar vetëm të miratoni ligje”, u shpreh ajo.
Deputetja e PD theksoi se opozitës i është mohuar e drejta për mbledhjen e Këshillit të Mandateve, për mocione me debat dhe për interpelanca me kryeministrin. Ajo denoncoi gjithashtu projekt-kalendarin parlamentar, ku, sipas saj, asnjë projektligj i opozitës nuk ka datë shqyrtimi, shkruan A2 CNN.
Zhupa solli si shembull projektligjin e saj për rritjen e pagave të mësuesve dhe heqjen e 5 mijë lekëshit të kategorisë, i cili sipas saj mbahet në sirtar. “Nuk e fusni për ta rrëzuar, por as për ta miratuar, sepse nuk ju lejon qeveria”, deklaroi ajo, duke e cilësuar Kuvendin si një institucion të nënshtruar plotësisht ndaj vullnetit të kryeministrit Edi Rama.
