Pas ngjarjes së ndodhur mbrëmë në orët e vona në Korçë ku u dhunua një 35-vjeçar nga persona të armatosur dhe me maska, të cilët më pas i grabitën mjetin tip “Benz”, policia fton qytetarët të japin informata kundrejt një shpërblimi monetar.
Drejtoria Vendore e Policisë Korçë, në vijim të hetimeve lidhur me zbardhjen e ngjarjes që ndodhi dje më datë 06.01.2018, ku nga persona ende të paidentifikuar në lagjen nr 3 Korçë, është vjedhur mjeti tip “Benz” me targa AA875II në pronësi të shtetasit D.A, vendos në dispozicion shumën prej 200.000 lek të reja, për çdo shtetas që mund të ketë informacion të saktë mbi vendndodhjen e mjetit apo identitetin e personave.
Policia e Korçës iu bën thirrje qytetarëve të bashkëpunojnë për zbardhjen e kësaj ngjarje dhe të telefonojnë në numrat: 0694134733 ose 0694112291.
***
Një 35 vjeçar është goditur me sende të forta në periferi të Korçës mbrëmjen e shkuar nga dy persona të maskuar dhe më pas i kanë grabitur makinën e tij.
Policia lokale sqaron se ngjarja ka ndodhur rreth orës 20:30 minuta në rrugën që të çon drejt Malit Moravë, ku shtetasi me iniciale D.A, banues në fshatin Burimas, i cili ndodhej brenda mjetit të tij tip “Mercedes-Benz”, është goditur me sende të forta. “Nga të dhënat paraprake dyshohet se personat pasi kanë goditur me sende të forta shtetasin D.A, kanë marrë mjetin e këtij të fundit dhe janë larguar me shpejtësi”, sqaron policia.
35 vjeçari shoqërohej në mjet me shtetasen E.G.
Policia lokale sqaron se dy shtetasit që ndodheshin në mjetin tip Benz kanë dhënë dëshmitë e tyre në policinë e Korçës.
Nga ana e Policisë, janë ngritur pika kontrolli me qëllim identifikimin dhe kapjen e autorëve. Grupi hetimor po punon për zbardhjen e plotë të rrethanave të ngjarjes.
a.ç
