Prokuroria e Sarandës ka kërkuar masën e sigurisë “Arrest me burg” për shtetasin francez me iniciale Z.K., i akuzuar për veprën penale të “Mashtrimit kompjuterik”.
Sipas Prokurorisë, shtetasi francez, në bashkëpunim me persona të tjerë, dyshohet se ka përvetësuar të dhëna bankare të qytetarëve shqiptarë përmes një skeme mashtrimi online.
Nga hetimet rezulton se autorët përdornin karta SIM të regjistruara me identitete të tjera dhe dërgonin në mënyrë masive mesazhe mashtruese në telefonat e qytetarëve. Mesazhi përmbante një njoftim të rremë në emër të Posta Shqiptare, ku qytetarëve u kërkohej të paguanin një tarifë doganore për një paketë të pretenduar.“POSTA SHQIPTARE: Paketa juaj AL91359200 i nënshtrohet tarifave doganore (55 ALL). Ju lutemi, konfirmoni dorëzimin në:https://aktivpostalb.com”, shkruhej në mesazhet mashtruese.
Sipas organit të akuzës, përmes këtij linku qytetarët drejtoheshin në një faqe të rreme, ku kërkoheshin të dhëna personale dhe bankare, të cilat më pas dyshohet se përdoreshin për përfitime të paligjshme financiare.
Më 26 maj 2026, me kërkesë të Prokurorisë së Sarandës, Gjykata e Shkallës së Parë e Juridiksionit të Përgjithshëm Sarandë vendosi masën e sigurimit personal “Arrest në burg” ndaj shtetasit francez, sipas nenit 238 të Kodit të Procedurës Penale.
Hetimet për këtë çështje vijojnë, ndërsa autoritetet po punojnë për identifikimin e personave të tjerë të përfshirë në skemën e dyshuar të mashtrimit kompjuterik.
