Një investigim, i cili zgjati më shumë se një vit, i ka lejuar policisë italiane të zbulojë një sërë pensionesh sociale të të dhëna padrejtësisht nga INPS (Instituti Kombëtar i Sigurimeve Shoqërore) drejt shtetasve të huaj. Kështu operacioni i karabinerëve të provincës së Savonas kanë denoncuar 40 persona për dëme ndaj shtetit italian. Janë plot 29 qytetarë shqiptarë, 4 ukrainas, 3 marokenë dhe 4 shtetas të tjerë të cilët do të ndiqen në gjendje të lirë.
Skema të cilët përdornin këta shtetas të huaj ishte e thjeshtë. Fillimisht merrnin në mënyrë të rregullt çekun social, i cili përfitohet kur jeton në Itali prej më shumë se 10 vitesh, ke mbushur moshën 65 vjeç dhe ke pak ose aspak kontribute shoqërore.
Pasi përfitonin pensionin, këta individë ktheheshin në vendet e origjinës. Këtu qëndron parregullsia, pasi është kusht që kush përfiton nga pensioni duhet të qëndrojë në territorin italian. Nëse largohesh për më shumë se 30 ditë larg vendit, duhen lajmëruar institucionet përkatëse për të pezulluar kontributin, raporton “Scan”.
Ndërsa këta pensionistë thyenin çekun, i cili varionte nga 448 euro në një maksimum prej 700 eurosh, dhe largoheshin nga vendi. Hetimi i policisë nisi pas sinjalizimit të INPS-së, e cila nuk arrinte të kontaktonte disa nga të huaj që përfitonin pensionin social. Nga përmbyllja e investigimit policia zbuloi se nga 275 pensione të dhëna, 67 ishin të parregullt. 40 persona janë dërguar për ndjekje penale, ndërsa për 27 të tjerë janë marrë masa administrative. Falë operacionit, u bë e mundur kthimi i 506 mijë eurove në arkat e shtetit.
