Dita mëson se ndonëse kanë artikuluar akuza të forta ndaj disa zyrtarëve të administratës apo dhe të zgjedhur të së majtës, demokratët kanë depozituar vetëm kërkesa për të marrë dosjet e tyre, por jo që ky institucion të nisë hetimet.
Sipas ligjit që u miratua me konsensus të plotë midis palëve, të drejtën e nismës për verifikimin e të dhënave e kanë 1/10 e deputetëve, kryetari i Kuvendit, kryeministri, prokurori i Përgjithshëm për një deputet të Kuvendit të Shqipërisë apo një anëtar të Këshillit të Ministrave, përfshirë kryeministrin, për një të zgjedhur në organet e bashkisë apo të qarkut, si dhe për anëtarin apo drejtuesin e një organi kushtetues apo të krijuar me ligj dhe që zgjidhet me votim nga Kuvendi i Shqipërisë.
Nisur dhe nga deklaratat e PD-së ndaj punonjësve të policisë së shtetit, ligji i jep të drejtën çdo deputeti që të kërkojë verifikimin e figurës për drejtuesit dhe pjesëtarët e shërbimit civil të çdo niveli në administratën publike, në nivel qendror ose vendor, Policinë e Shtetit dhe Forcat e Armatosura.
Kërkesa për verifikim duhet të përmbajë të dhëna, fakte apo rrethana specifike. Mungesa e tyre, në çdo rast, nuk pengon fillimin e verifikimit, sipas këtij ligji.
Çdo nismëtar i kërkesës gjobitet me 100 000 lekë kur pas kryerjes së verifikimit, kërkesa dukshëm është kryer me të dhëna të pavërteta. Të drejtën për të bërë kërkesën për verifikim paraprak për kandidatura në zgjedhje apo organe kushtetuese apo të krijuara me ligj e ka edhe një parti politike për kandidatë të mundshëm të saj. Kjo kërkesë bëhet edhe jashtë periudhës zgjedhore dhe vetëm me pëlqimin e shtetasit, subjekt i verifikimit.
Formulari i kërkesës nënshkruhet nga kryetari i partisë apo një person i autorizuar prej tij, si dhe nga personi, subjekt i verifikimit. Ka qenë vetëm KQZ dhe prokuroria që kanë verifikuar disa të zgjedhur, por pa pasur kërkesë nga ndonjë subjekt tjetër.
ma.me
