Pajisja me pasaporta bullgare, është shndërruar në një fenomen në shumë zona, kryesisht rurale, pasaporta të cilat shfrytëzohen më pas për të emigruar në vende të ndrsyhme të Bashkimit Evropian. Grupe të ndryshme nga ky vend i BE e kanë kthyer në biznes sigurimin e pasaportave për qytetarë nga vende që nuk janë anëtarë të BE-së.
Por veç këtyre grupeve që sigurojnë këto pasaporta false, apo në shumë raste ndërmjetësojnë edhe për shtetësi bullgare, duke dhënë pasaporta të rrugullta, kanë nisur aktivitetin e jashtëligjshëm edhe shumë grupe mashtruesish shkruan JavaNews.
Një hetim të tillë ka nisur prokuroria e Elbasanit për një shtetas nga Tirana dhe një tjetër nga Durrësi. Ata kanë mashtruar një 65-vjeçar, duke i premtuar se do t’i siguronin pasaportë bullgare për vajzën e tij dhe do ta dërgonin për emigracion në Angli.
Por pasi i kanë marrë një shumë parash, shtetasit me inicialet M.R. 59-vjeç dhe A.H. 50-vjeç nuk janë bërë më të gjallë. Pas kontakteve me 65-vjeçarin ata embanin me mashtrime. Por ky i fundit i’u drejtua policisë e cila tashmë ka nisur verimet bashkë me prokurorinë./JavaNews/a.m.
