Plot 2106 gjoba për shkelje të masave anti-COVID. Është ky bilanci i Policisë së Shtetit për fundjavën, për qytetarët që kanë shkelur masat e vëna nga Komiteti Teknik i Ekspertëve me qëllim parandalimin e përhapjes së COVID-19.
Më konkretisht janë vendosur 2005 gjoba për mosvendosjen e maskës mbrojtëse; 7 gjoba për shkeljen e vetëkarantinimit të detyrueshëm, 9 gjoba për bizneset që nuk kanë respektuar protokollet e sigurisë dhe orarin e mbylljes dhe 85 gjoba për këmbësorët që janë konstatuar duke lëvizur pas orës 22:00.
Bazuar mbi shumën që qytetarët duhet të paguajnë, buxhetit të shtetit vetëm gjatë kësaj fundjave i shkojnë rreth 21 mln lekë.
Njoftimi i plotë i forcave të rendit:
Gjatë fundjavës, strukturat e Policisë kanë vendosur 2106 masa administrative në të gjithë vendin, për shkelje të masave anticovid, konkretisht:
- 2005 masa për mosvendosjen e maskës mbrojtëse;
- 7 masa për shkeljen e vetëkarantinimit të detyrueshëm;
- 9 masa për subjektet që nuk kanë respektuar protokollet e sigurisë dhe orarin e mbylljes;
- 85 masa për këmbësorët që janë konstatuar duke lëvizur pas orës 22:00.
Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.
Si rezultat i këtyre kontrolleve, gjatë fundjavës, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 2005 qytetarë që janë konstatuar duke lëvizur pa maskat mbrojtëse.
Në vijim të kontrolleve për zbatimin e vetëkarantinimit të detyrueshëm nga shtetasit e infektuar me COVID-19, janë evidentuar 7 shtetas që kanë shkelur rregullat e vetëkarantinimit, të cilët janë ndëshkuar me masë administrative 700.000 lekë secili.
Gjithashtu, gjatë kontrolleve, shërbimet e Policisë kanë konstatuar 9 lokale, në ambientet e të cilëve kishte muzikë pas orës 20:00 dhe nuk respektoheshin protokollet e sigurisë. Secili prej subjekteve është ndëshkuar me masën administrative 1.000.000 lekë.
Gjatë kontrolleve në fundjavë janë shoqëruar në ambientet e Policisë në të gjithë vendin, 21 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.
Gjithashtu, gjatë fundjavës, pas orës 22:00 janë konstatuar edhe 85 qytetarë që lëviznin në rrugë pa arsye të domosdoshme, të cilët janë ndëshkuar me masën administrative 10.000 lekë secili.
Policia e Shtetit, krahas punës për parandalimin, evidentimin dhe goditjen e paligjshmërisë, sigurimin e rendit dhe qetësisë publike, do të vijojnë punën për monitorimin e zbatimit të masave anticovid në të gjithë vendin. Në këtë kuadër i bëhet thirrje të gjithë qytetarëve që të zbatojnë masat anticovid dhe të mos dalin nga banesat e tyre pas orës 22:00 deri në orën 06:00.
