“Po i dërgoja mëngjesin në shtrat. Pashë një mesazh që i erdhi nga një djalë tjetër në celular. Mora thikën që ishte në tabaka dhe e vrava. Nuk e kisha paramenduar”.
Kështu është shprehur 23-vjeçari Mark Antony Samson në lidhje me vrasjen e ish të dashurës së tij shqiptare, Ilaria Sula. Siç shkruajnë mediat, i riu me origjinë filipinase u mor në pyetje për 5 orë për të treguar të gjithë të vërtetën.
Sipas tij, Sula u vra mëngjesin e 26 Marsit pasi kaloi natën në shtëpinë e tij. Samson tha se 22-vjeçarja i kishte shkuar në shtëpi për t’i kthyer disa rroba. Por i riu thotë se ajo vendosi të qëndronte aty pasi donte të shmangte transportin publik.
Dyshja ishte ndarë së fundmi, pasi sipas filipinasit lidhja kishte pasur ulje-ngritjet e veta gjatë këtyre muajve. Samson thotë se ajo që e ka bërë të ndërmarrë veprimin ka qenë mesazhi në celularin e Ilarias kur ai po i dërgonte mëngjesin në shtrat.
“E sulmova nga pas, duke e goditur në qafë”, tha ai, duke mohuar se vrasja ishte e paramenduar dhe duke hedhur idenë se gjithçka ka ndodhur për shkaqe xhelozie.
Samson ka deklaruar se gjithçka e ka bërë vetëm dhe ka zgjedhur të heshtë kur është pyetur rreth pranisë së prindërve në shtëpi. I riu ka treguar më pas se e ka futur trupin në një valixhe dhe e ka hedhur në një greminë.
Hetuesit do të duhet të vërtetojnë deklaratën e tij duke analizuar kompjuterin e vajzës, pasi deri më tani celulari i saj nuk është gjetur. Autori i vrasjes e ka hedhur atë në një pusetë, ndërsa thikën në një kazan. Sa i përket prindërve të tij, ata mbeten nën hetim.
Prokuroria e akuzon 23-vjeçarin për vrasje të rëndë me dashje dhe fshehje të trupit të pajetë.
