Vrasja e trefishtë e ndodhur me 27 maj në bulevardin “Zogu i Parë”, në Tiranë do të hetohet edhe nga një grup prokurorësh hollandezë.
Hetuesit e huaj kanë ardhur në Tiranë, pasi provat e deritanishme tregojnë se kjo ngjarje është e lidhur me vrasjen e Durim Sulkut, të ndodhur me 6 prill në qytetin hollandez të Roterdamit.
Me 27 maj vëllai i Durim Sulkut, Besnik Sulku, në bashkëpunim me italianin Salvatore Letizia i bënë atentat Mentor Doçit, i cili mbeti i vrarë bashkë me mikun e tij, Gerti Goxhaj.
Në përplasjen me armë nipërit e Doçit ekzekutuan Besnik Sulkun. Italiani u arrestua bashkë me dy nipërit e Mentor Doçit, vëllezërit Markeljan dhe Klejvi Doçi.
Në dëshmitë e tyre hetuesit shqiptarë kanë gjetur të dhëna që i lidhin dy ngjarjet. Dyshohet se zinxhiri i vrasjeve ka të bëjë me prishjen e pazareve të drogës.
