Një masakër ka ndodhur ditën e sotme në Beograd ku 8 nxënës dhe një roje kanë mbetur të vrarë në një shkollë fillore, si pasojë e të shtënave me armë zjarri nga një 14-vjeçar.
Mes të vdekurve janë 7 vajza dhe një djalë, të cilët ndodheshin në ambiente të ndryshme të shkollës në momentin që i mituri ka qëlluar drejt tyre duke i lënë të vrarë, shkruan Euronews Serbia.
Shefi i Departamentit të Policisë në Policinë e Beogradit, Veselin Miliç, tha se 14-vjeçari e kishte planifikuar këtë krim për një muaj dhe se kishte një listë të fëmijëve që planifikonte t’i likuidonte. Ai tha gjithashtu se arma e përdorur në krim është marrë nga banesa nga babai i studentit të dyshuar.
“Hetimet dhe zbardhja e fakteve janë duke u zhvilluar. Nga të dhënat e deritanishme, fëmija K.K e kishte planifikuar për një kohë të gjatë ekzekutimin e kësaj vepre penale, ende nuk është përcaktuar motivi dhe as ai nuk e ka deklaruar. Ai zgjodhi ditën 3 maj 2023, për arsye se klasa e historisë ishte afër hyrjes së shkollës dhe klasa e parë ishte departamenti i tij, VII/2. Pistoleta që u gjet ishte e kalibrit 9 mm me tre karikatorë, një pistoletë e kalibrit të vogël ia ka marrë babait nga banesa, të cilën e ka lënë në një qese të cilën e ka përgatitur dhe në të cilën ka pasur katër kokteje molotovi”, ka thënë Miliç.
Ai ka shpjeguar se me të mbërritur në shkollë, adoleshenti ka nxjerrë menjëherë një armë nga çanta dhe ka qëlluar rojën e sigurisë dhe më pas ka qëlluar mbi nxënësit duke vrarë 8 prej tyre.
Miliç tha gjithashtu se K.K kishte një listë të fëmijëve që planifikonte t’i likuidonte.
I dyshuari, siç ka shpjeguar Miliç, më pas del nga klasa dhe shkon në oborrin e shkollës, ku nxjerr karikatorin e armës, e hedh nga shkallët, thërret policinë dhe më pas ndalohet.
“Siç deklaroi vetë, ai kishte planifikuar ta bënte këtë, kishte edhe një listë e fëmijëve që planifikonte t’i likuidonte. Ai vetë bëri një plan për të hyrë në shkollë dhe për t’u larguar prej saj, e cila u gjet në tavolinën e tij. Dhe siç tregoi vetë, ai i përcaktoi objektivat prioritare. Skicat duken si nga ndonjë lojë apo ndonjë film horror, gjë që tregon se ai ka planifikuar në detaje sipas klasës së shkollës se si të hyjë në cilën klasë dhe si të likuidojë cilin fëmijë dhe në çfarë numri”, tha Miliç, duke treguar listën.
/s.f
