Pas ngjarjeve të ndodhura dy ditë më parë në Elbasan ku humbën jetën 3 persona dhe u plagosën 8 të tjerë, ka reaguar familja Mema, e cila ka mohuar të ketë lidhje me ngjarjen kriminale. E ndodhur në Itali, familja Mema në reagimin e saj shkruan se media duhet t’i referohet burmeve zyrtare dhe të mos aludojë për gjëra që nuk janë.
“Mbiemri ynë është keqpërdorur nga ana e medias dhe veçanërisht nga shtypi shkruar. Ne jemi larg kësaj ngjarje dhe këtij konflikti që po përflitet. Qyteti i Elbasanit na njeh se cilët jemi dhe i kërkojmë medieve që ti referohen vetëm burimeve zyrtare dhe burimeve të tjera të konfirmuara pasi aludohet për lidhje familjare që nuk ekzistojnë. Gjithashtu i kërkojmë strukturave shtetërore që të vazhdojnë punën për zbardhjen e ngjarjes”- shkruhet në deklaratë.
Grupi hetimor ka konfirmuar ndërkohë se autorët e masakrës së Elbasanit kanë pasur si shënjestër të tyre fisin Çapja. Sipas hetimeve, një motiv për vrasjet e ndodhura në Elbasan dhe të mirëorganizuara nga autorët e veshur me uniforma policie, është edhe trafiku i drogës dhe larja e hesapeve për konflikte të vjetra mes dy familjeve.
Në lokalin në pronësi të Agron Çapjes, vëllait të biznesmenit të vrarë në vitin 2005, ishin 4 anëtarë të familjes së tij. Vetë pronari mbeti i vdekur, bashkë me dy miq të familjes, ndërsa vëllai dhe dy nipërit e Sokol Çapjes, u plagosën.
