Arbër Paplekaj, ish-efektivi i repartit Special RENEA zyrtarisht është marrë i pandehur nga prokuroria e Elbasanit
Paplekaj akuzohet për “Vrasje në rrethana cilësuese” në dëm të 1 ose më shumë personave kryer në mënyrë të rrezikshme për jetën e shumë individëve” si dhe “Plagosjen e punonjëses së Policisë së Shtetit”.
Ish-punonjësi i policisë Arbër Paplekaj, rezulton autor i vrasjes së Pjerin Xhuvanit (Pipi), tentativës së vrasjes të dhëndërit të tij, Eltjon Bodinaku, si dhe plagosjes së punonjëses së policisë, Xhensila Sota.
Deri në këtë fazë të hetimit, prokuroria e Elbasanit nuk ka qenë në gjendje të zbulojë se kush nga personat në përplasjen me armë të 21 Prillit 2021, ka plagosur, dy ish-policët Emiljan Prenga, Pavlo Vuksani, të cilën ishin pjesë e Strukturës së Mbrojtjes së Votës të Partisë Demokratike, ku aderonte dhe Arbër Paplekaj.
Për zbulimin e autorëve të plagosjes së tyre, hetimi është ndarë në një procedim tjetër, duke i lënë detyra të tjera policisë kriminale, me qëllim zbulimin e ngjarjes.
Njëherësh mbyllja e hetimeve dhe komunikimi i akuzës “Shpërdorim detyre”, i është bërë dhe dy zv/drejtorave të Policisë së Qarkut Elbasan, Nikollaq Palla dhe Albert Nushi, të cilët aktualisht ndodhen në masën e sigurisë “arrest shtëpie”.
“Ora News” mëson se të pandehur në këtë dosje, janë marrë dhe 6 efektivët e patrullës “Shqiponja” si Dedjon Duraku, Pëllumb Bicaku, Erjon Balla, Besmir Kadiu, Donald Dedja dhe Erjon Meçja, të cilët do përballen në gjykate me akuzën e “Deklarimit të rremë”.
Mësohet se nën akuzë është vënë dhe i riu Eldjo Beko, ndaj të cilit mësohet se prokuroria ka ngritur akuzën e “Veprimeve që pengojnë zbulimin e të vërtetës”.
Ndërsa për Klemend Xhaferin ose siç njihet ndryshe në Elbasan si “Kel Çami”, është kërkuar pushimi i akuzës së vrasjes, pasi nga pamjet filmike rezulton të mos ketë pasur armë në dorë dhe nuk ka kryer asnjë veprim të paligjshëm ndaj personave në vendngjarje.
Por ai vrapon për t’ju shmangur plumbave. Xhaferi për 13 muaj qëndroi në arrati, ndërsa doli nga gjendja e arrestit në burg, në datën 13 Maj 2022, pas një vendimi të dhënë nga gjykata e Elbasanit.
Nga gëzhojat e gjetura në vendngjarje rezulton se ish-efektivi i RENEA-s, Arbër Paplekaj ka qëlluar 7 herë nga pistoletë tip Glock 9mm, ndërsa nga pistoleta izraelite e cila ende nuk është gjetur është qëlluar 13 herë.
Në vendngjarje ka tre lloj armësh me të cilat është qëlluar./m.j
