Në “Interaktiv” të KTV-së në lidhje me ligjin e ri për rregullat e trafikut ka folur Jeton Rexhepi nga Policia e Kosovës.Sipas Rexhepit, qëllimi kryesor i ndryshimit të ligjit ka qenë ndikimi në parandalimin e aksidenteve, disiplinimi i shoferëve dhe mbrojtja e ambientit, transmeton Koha.net.
Gjobat kanë ndryshuar në shumën e dënimit duke rrumbullakësuar shumat e dënimeve, sikur nga 15 euro në 20 euro, duke shtuar se gjobat që mund t’i japë policia aty për aty janë nga 20 euro deri në 60 euro. Por gjoba më e madhe është 900 euro që procedohet nga policia në gjykatë, e atë e sqaroi zyrtari policor Jeton Rexhepi.
“Dënimi deri në 900 euro është për tejkalim shpejtësie në zona të banuara, nëse kalon mbi 50km/h me shpejtësinë që është e lejueshme (nëse është e lejuar 50km/h të ecë 100km/h) atëherë dënohet nga 300-900 euro, ndalohet leja për 1 ose 2 vjet dhe i hiqen 5 pikë”, ka sqaruar Rexhepi, duke thënë se 80% e aksidenteve kanë rrjedhur nga tejkalimi i shpejtësisë.
Nëse e paguani gjobën brenda afatit 8-ditor nga dita e dënimit, atëherë mund ta kryeni me vetëm gjysmë shume, kurse pas 8 ditëve duhet paguar i tëri. (b.an)
