Kryeministri i Pakistanit, Shehbaz Sharif, ka deklaruar se është arritur një tekst përfundimtar i dakorduar për një marrëveshje paqeje mes Iranit dhe Shteteve të Bashkuara.
Sipas tij, paqja nuk ka qenë kurrë më afër se tani. Sharif tha se Pakistani po bashkëpunon ngushtë me të dyja palët për të përcaktuar hapat e ardhshëm. Ai gjithashtu akuzoi disa aktorë për përhapje dezinformatash me qëllim sabotimin e marrëveshjes.
Ndërkohë, Donald Trump i ka thënë kryeministrit izraelit Benjamin Netanyahu se marrëveshja është pozitive dhe se ka ardhur koha për t’i dhënë fund luftës.
Sipas televizionit izraelit Channel 12, Trump e ka bërë këtë deklaratë gjatë bisedës së tyre të fundit telefonike.
Një burim amerikan tha se Netanyahu foli pak gjatë telefonatës, pasi e kuptoi se nuk kishte mundësi të ndikonte në marrëveshje.
Trump e ka cilësuar si “shumë pozitiv” postimin në platformën X të ministrit të Jashtëm iranian, Abbas Araghchi, i cili deklaroi se një marrëveshje mes Iranit dhe Shteteve të Bashkuara “nuk ka qenë kurrë më pranë”.
Lajmi u bë i ditur nga vetë Trump, i cili ripublikoi deklaratën e Araghchi-t në platformën e tij, Truth Social, gjatë një bisede me gazetarin Barak Ravid të Axios.
Trump theksoi gjithashtu se vazhdon të besojë se nënshkrimi i një marrëveshjeje me Iranin mbetet i mundur brenda fundjavës ose, më së voni, të hënën.
