Rithemelimi ka deklaruar se nuk do të njohë marrëveshjen e nënshkruar sot mes Ramës dhe investitorit Muhammed El Alabbar për zhvillimin e projektit të portit të ri turistik të Durrësit. Në një deklaratë për mediat, zëdhënësja e PD-së së Berishës, Floriana Garo tha se marrëveshja e nënshkruar nuk do të njihet, duke shtuar se sipas saj Rama është një kryeministër në ikje.
“Pas pesë ditëve në arrati, Edi Rama u shfaq për të mbuluar një aferë korruptive me një tjetër. Për të mbuluar me heshtje McGonigalin, ai sot nënshkroi marrëveshje me Alabarin për Durrës Yacht Marina, një tjetër rast tipik i abuzimit, mostransparencës dhe përdorimit të pronës publike në forma private dhe korruptive.
Partia Demokratike e konsideron zëvendësimin e portit kryesor të vendit me një kënd lojrash të oligarkëve dhe shërbëtorëve të tyre, si një aferë korruptive e cila mund të nënshkruhet, por nuk do të njihet asnjëherë. Partia Demokratike, as e njeh dhe as do ta njohë marrëveshjen e nënshkruar sot mes një kryeminisri në ikje dhe një përfituesi si Alabari, apo çdokujt tjetër, nga cilado kombësi apo me çfarëdolloj pasaporte e pasurie”- u shpreh zëdhënesja e Rithemelimit.
Sipas Rithemelimit, nënshkrimi i marrëveshjes bëhet me qëllim që kryeministri Edi Rama të mbulojë hetimin e FBI-së. Mes të tjerash thuhet se Rama nuk ka mbështetje nga Bashkimi Europian sa i takon projektit të portit dhe amnistisë fiskale.
“Dalja sot e Ramës për të inauguruar, në këtë ditë të zezë të tij punët e zeza në shpinë të Durrësit dhe Shqipërisë, Marinën e Yahteve të oligarkëve dhe sejmenëve të tyre, është përpjekja e radhës për të mbuluar hetimin e FBI, ku ai është subjekt i cili djeg ata që janë përfshirë në të dhe i lë pa gjumë. Partia Demokratike dhe opozita e kanë denoncuar këta vjedhje të hapur, duke dërguar ndër të tjera edhe një kërkesë për hetim në Komisionin Europian sa i takon përputhjes së kësaj marrëveshjeje me MSA dhe standardet e BE.
Përgjigja e Komisionerit Varlehy ndaj kërkesës së 21 deputetëve ka qenë e qartë: anulim i grantit të BE dedikuat Portit të Durrësit. Ky është konteksti i izolimit në të cilin Edi Rama i kryn veprimet e tij. Ai nuk ka mbështetje as për portin, as për amnistinë fiskale, as për pasaportat e arta”-shtoi Garo.
Ditën e sotme, kryeministri, Edi Rama dhe investitori Muhammed El Alabbar kanë nënshkruar marrëveshjen për zhvillimin e projektit të portit të ri turistik të Durrësit. Kryeministri u është përgjigjur edhe akuzave të opozitës duke theksuar se shteti zotëron 33% të aksioneve në këtë projekt me vlerë 2 miliardë euro.
Çfarë parashikon projekti?
Projekti do të zhvillohet në një sipërfaqe trualli prej 812 600 m2, që nga investimi, i kalon në pronësi kompanive. Parashikohen 12 000 apartamenteve dhe 2 hoteleve me 850 dhoma në total. Projekti parashikon 80 000 metër katror hapësira të gjelbra, ose hapësira të hapura dhe një gjatësi plazhi 700 metra. Faza e parë nis në 2023-shin e zgjat për 5 vite, me vlerë investimi € 595 milionë euro, dhe për fazën e dytë që pritet të nisë në 2028-ën, investimi është rreth 1 miliardë e gjysmë euro. Marrëveshja ka një jetgjatësi prej 35 vitesh, ndërsa përfundimi total i realizimit të projektit zgajt 20 vite. Qeveria shqiptare do të përfitoi gjatë gjithë kohës 33.3% të dividentit. Parashikohen 12 000 të punësuar./m.j
