Gjatë një bisede në Pragë me moderatorin Steve Clemons, në forumin e sigurisë GLOBSEC 2024, Rama u pyet edhe për marrëveshjen e emigrantëve me Italinë, nëse kjo do ta dëmtojë Shqipërinë në rrugën e saj drejt integrimit në BE, duke qenë se ka disa zëra kundër saj.
Kryeministri e rrëzoi kategorikisht një gjë të tillë duke thënë se vetëm disa progresistë e konsiderojnë këtë marrëveshje si diçka të keqe, ndërsa theksoi se ky është një problem Europian, shkruan A2 CNN.
“Ndodh që gazetarët nuk kanë informacion të saktë. Nuk është se shumë janë kundër në BE për këtë çështje. Nuk po thuhet që marrëveshja është e gabuar. Disa progresistë e konsiderojnë këtë marrëveshje si diçka të keqe, por unë nuk mund t’i bashkojë këto të dyja bashkë. Unë duhet të jem i dobishëm për Shqipërinë, që Shqipëria të jetë e dobishme për miqtë. Ne kemi shkuar në luftëra së bashku, të cilat i zgjodhët ju dhe ne erdhëm me ju, nuk i vumë në dyshim.
Marrëveshja në fjalë është për një temë kaq të madhe që është kaq e rëndësishme për Europën. Po flas për çështjen e emigracionit. Ta transferosh këtë në një zënkë mes të majtës dhe të djathtës, tregon se ky është një problem Europian, e cila nuk është gati të veprojë si një e vetme. Politikat partiake nuk na çojnë askund”, tha Rama.
