Sot, e mërkurë, 16 prill ka pasur një takim mes qeverisë dhe përfaqësueësve të transportit publik, ku qeveria ka vendour të subvencionojë karburantin për operatorët e transportit qytetas dhe ndërqytetas.
Gazetarja e Klan News, Ermelinda Hoxhaj dha më shumë detaje rreth këtij takimi ku u shpreh se është arritur një marrëveshje për subvencionimin lek për litër.
“Kjo është dita e dytë që është bllokuar transporti urban. Pati një reduktim të flotës së mjeteve me 40% por falë marrëveshjes që u arrit, një marrëveshje për subvencionim lek për litër e cila nuk është përcaktuar ende se sa do jetë vlera”, tha Hoxhaj.
Gazetarja Hoxhaj shtoi se mënyra e subvencionimit do jetë pak a shumë e njëjta si me krizën që ishte kur nisi lufta në Ukrainë.
“Ajo do përcaktohet në takimin që vjen javën e ardhshme midis shoqatës së transportit, ministrisë së Ekonomisë, ministrisë së Financave por edhe pushteteve lokale kryesisht por edhe bashkia e Tiranës që është më e madhja dhe ka një numër më të madh të linjave të transportit.
Është pak a shumë e njëjta mënyrë subvencionimi që është bërë nga qeveria si në krizën që pati në nisjen e luftës në Ukrainë kur edhe atëherë pati një rritje të çmimit të naftës”, theksoi Hoxhaj.
Ndërkohë Kreu i shoqatës së Transportit Urban, Dashnor Memaj në një intervistë për Klan News u shpreh se takimi me institucionet ishte konkret.
Memaj shtoi gjithashtu se masa e subvencionimit do jetë midis 50 dhe 70 lekë.
“Duhet të shkojnë të gjitha biletat në të njëjtin nivel. Është një marrëveshje e kërkuar nga ne. Kishte shumë qytetarë në stacione. Na u premtua që do zbardhet për dy ditë vendimi. Në fund të ditës është qytetari që ballafaqohet me kushte të këqija.
Reduktimi i mjeteve sjell pasoja edhe për turistët. Unë i përgëzoj edhe institucionet për angazhimin. Ky takim ishte konkret. Masa e suvenvionimi do jetë midis 50 dhe 70 lek, më e mundshmja është 70 lek. Për tre muaj do jetë 50 lek”, tha Memaj.
