Prokuroria e Përgjithshme iu përgjigj kërkesës së Mark Frrokut për të qenë i pranishëm në gjyqin që pritet të mbahet ndaj tij në Belgjikë, më 19 tetor të këtij viti.
Në përgjigjen kthyer Mark Frrokut, i bëhet e ditur se nuk është Prokuroria e Përgjithshme e Shqipërisë organi përgjegjës për pranimin apo jo të një kërkese të tillë. Në këto kushte, Mark Frroku duhet t’i drejtohet me një shkresë të ngjashme organeve të drejtësisë belge, ku dhe ai është i akuzuar për vrasje dhe pritet të rigjykohet. Gjykata belge mund ta aprovojë kërkesën e Mark Frrokut.
Në këto kushte, organet e drejtësisë belge do të duhet t’i dërgojnë një shkresë Prokurorisë shqiptare, ku veç pranimit të kërkesës së Mark Frrokut, do duhet të garantojnë se ai do vijojë të jetë nën masën e sigurisë “arrest në burg” edhe gjatë qëndrimit të tij në Belgjikë. Pas kësaj, bëhet transferimi i përkohshëm i të dyshuarit dhe në të njëjtën kohë, në Shqipëri pezullohen hetimet e nisura për vrasje.
Por kjo nuk do të thotë se Prokuroria shqiptare arkivon dosjen Frroku, pasi ndaj tij do të vijojnë hetimet për akuzat e “Fshehjes së pasurisë” dhe “Pastrimit të produkteve të veprës penale”.
