Pas Hungarisë, të tjera vende që janë prekur nga fluksi i kalimit të klandestinëve që vijnë nga lindja e mesme kanë nisur ngritjen e gardheve mbrojtëse. Me vendim të Këshillit të sigurisë së Shtetit, Maqedonia ka marrë të njëjtën masë në kufirin e saj me shtetin grek. Autoritete maqedonase kanë nisur punën konkrete ëpr ngritjen e këtij gardhi.
Mediat raportojnë se përgjatë hapësirës kufitare që ndan Maqedoninë dhe Greqinë janë parë kamionë të shumtë, të cilët sjellin materialet e nevojshme.
Ndërkohë, edhe kryeministri i Maqedonisë ka shprehur shqetësimin e tij lidhur me paralajmërimet e shteteve fqinje se do i mbyllin kufijtë e tyre, me qëllim të uljes së valës së refugjatëve. “Ushtria ka marrë detyrë që të përgatisë terrenin. Pason periudha e dimrit dhe do të jetë shumë e vështirë në dhjetor dhe në janar, po qe se do të jetë e nevojshme, të vendosen barriera të caktuara. Ndërkohë, ushtria do të bëjë përgatitjet e duhura dhe ashtu si do të shkojnë punët në Evropë, edhe ne do të reagojmë në mënyrën përkatëse”, ka thënë Nikolla Gruevski.
Sipas Gruevskit, “tani për tani, kjo masë nuk do të ndërmerret, por janë duke u bërë përgatitjet për këtë gjë, siç janë pastrimi i terrenit, gërmime dhe nëse do të ketë nevojë të vendosen edhe shtylla”.
