Një ditë para se të publikohet vlerësimi i ndërkombëtarëve, nëse në Maqedoni janë plotësuar kushtet për zgjedhje demokratike, kreu i BDI-së Ali Ahmeti nuk e ka përjashtuar mundësinë për shtyrjen e tyre.
Ai ka zbutur qëndrimin e tij kategorik, se zgjedhjet duhet të mbahen më 24 prill, pas takimit me ambasadorin amerikan në Shkup, Jess Baily, që zgjati më shumë se tri orë. Të enjten, Ahmeti tha se, shtyrja e datës duhet të ndodhë me marrëveshje të re mes 4 partive kryesore në vend.
“Bashkimi Demokratik për Integrim është i përkushtuar, që zgjedhjet të jenë të besueshme për të gjitha palët”, tha Ali Ahmeti, kryetar i BDI-së.
Udhëheqësi i LSDM-së opozitare, Zoran Zaev, i cili ka paralajmëruar se partia e tij nuk do të marrë pjesë në zgjedhjet e parakohshme të 24 prillit, pret që edhe përfaqësuesit e bashkësisë ndërkombëtare në vend të konfirmojnë të premten se, në Maqedoni nuk ekzistojnë kushtet për zgjedhje të lira dhe demokratike.
“Nuk ekziston asnjë alternativë, që zgjedhjet të organizohen në mënyrë të njëanshme. Opozita ka në dispozicion të gjitha mekanizmat e mundshme politike për të pamundësuar një proces elektoral, që mund të organizohet në mënyrë të njëanshme nga qeveria”, tha Zoran Zaev, kryetar i LSDM-së.
Këto komente, Zaev i bëri pas takimit me drejtuesit e lëvizjes politike “BESA”. Ndërkohë, i vetmi që nuk sheh arsye për shtyrjen e zgjedhjeve është kryeministri i qeverisë teknike, Emil Dimitriev, i cili kërkon që votimet të mbahen më 24 prill, siç ishin marrë vesh krerët e 4 partive kryesore në Maqedoni, verën e kaluar.
TCH
