(Update) Një vajzë 8-vjeçare, prindi i saj dhe tre persona të moshuar kanë mbetur të vrarë gjatë aksionit policor në lagjen e “Trimave” në Kumanovë. Lajmi bëhet i ditur nga mediat maqedonase të cilat citojnë banorë të kësaj lagje.
Sipas tyre banorët e vrarë janë shqiptarë, pasi aksioni ka ndodhur në vendbanim të banuar tërësisht me shqiptarë. Po ashtu ata shprehet se bëhet fjalë për anëtarë të një familje që jeton afër ambulancës shtetërore në këtë lagje.
Nga ana tjetër, raportohet për të vdekur edhe në radhët e policisë. Sipas portalit maqedonas “Plusinfo” bëhet e ditur për policë të vrarë dhe dhjetëra të plagosur.
Ndërsa deri tani mësohet për 15 të plagosur që janë dërguar në Klinikën e Shkupit dhe se një pjesë e tyre thuhet se ja civilë dhe policë.
Po ashtu policia ka arrestuar edhe disa persona ne lagjen e “Trimave” ne Kumanove.
Megjithatë nga ana e autoriteteve maqedonase nuk ka konfirmim zyrtar, ndërsa situata vijon të mbetet mjaft e tensionuar.
Maqedoni, 70 të armatosur përleshje me policinë, 5 të plagosur
Një përleshje e fuqishme të shtënash me armë mes forcave të policisë së Maqedonisë dhe një grupi të armatosur ka krijuar një situatë mjaft të tensionuar në lagjen e “Trimave” në Kumanovë, zonë e banuar kryesisht me shqiptare.
Lajmi bëhet i ditur nga mediat maqedonase sipas të cilave përleshja e ashpër ka ndodhur rreth 05:00 të mëngjesit të së shtunës, ku dyshohet se janë rreth 70 persona të cilët kanë qëlluar me armë. Po ashtu nënvizohet fakti se si pasojë e të shtënave 5 efektivë të policisë kanë mbetur të plagosur.
Sipas të dhënave paraprake të armatosurit dyshohet të jenë shqiptarë, por mbetet ende i paqartë qëllimi i këtij konflikti të armatosur.
Megjithatë nga ana e analistëve vendas nuk përjashtohet mundësia se ky konflikt bëhet për të hequr vëmendjen më ate se cfarë po ndodh në politikën e tensuar të Maqedonise, pas “bombave” të përgjimeve nga lideri i opozitës Zoran Zaev.
Për të neutralizuar grupin e armatosur, autoritetet maqedonase kanë dërguar forcatë shumta policie si dhe helikopterë ushtarakë. Sakaq në disa shtëpi shihet edhe tymi dhe krisma të fuqishme, të cilat dëgjohen në video amatore të sjellë nga portalet vendase.
Kumanova është blinduar nga forcat policore që nuk lejojnë lëvizjen në drejtim të lagjes së “Trimave”, ndërsa pavarësisht dyshimeve të banorëve për të plagosur, nga spitali i Kumanovës ende nuk ka asnjë konfirmim zyrtar.
Redaksia Online
(JavaNews.al)
