Ish-ministri i Drejtësisë, Ylli Manjani, ka shprehur shqetësimin e tij lidhur me deklaratat e kryetares së Këshillit të Lartë të Prokurorisë, Mirela Bogdani, e cila ka kërkuar personel ndihmës për t’i përgatitur komentet mbi Kodin e ri Penal.
Sipas Manjanit, kjo kërkesë është shprehje e cekësisë dhe burokratizimit që Reforma në Drejtësi i ka sjellë sistemit, duke krijuar institucione “parazite” në nivel kushtetues, siç është KLP.
Komenti i plotë i Ylli Manjanit
Zonja Mirela Bogdani, kryetarja e Këshillit të Lartë të Prokurorisë, kur e kanë pyetur në Komisionin e Ligjeve në Parlament “a keni ju një mendim për projekt-kodin e ri penal?”, është përgjigjur:
“Nuk kemi personel ndihmës që të na përgatisë komente për Kodin e ri…”
Sinqerisht, nuk e kuptoj fare — po fare, fare — logjikën e kësaj përgjigjeje.
Tani, zonja kërkon ndihmës të punësuar në administratën e KLP-së që t’i përgatisin mendimet për projekt-kodin penal?!
Seriozisht?
Po nëse këtë punë do ta bëjnë të punësuarit që ajo kërkon, për çfarë na duhet ajo dhe KLP-ja?!
Po të jetë kështu puna, le t’i pyesim direkt ata që do punësohen aty, që ta japin mendimin vetë, pa qenë nevoja për firmën e zonjës Bogdani.
Si mund të kërkosh personel për dhënie mendimesh që kërkohen nga vetë ti si individ, apo si bashkësi profesionistësh në përbërje të KLP-së?
Sepse, në fakt, ajo dhe KLP-ja, që përbëhet nga prokurorë e juristë, janë pyetur nëse kanë një mendim profesional për një kod të ri — jo si institucion burokratik.
KLP nuk e ka detyrë të japë opinione për projektligje, por çdo jurist, aq më tepër kur është pjesë e sistemit, duhet të ketë një mendim profesional.
Sipas logjikës së zonjës, ne që kemi një mendim duhet të kërkojmë personel që ta japim?!
Kaq “blu” e ka gjakun zonja, sa edhe mendimet i jep me personel?!
Ç’bëhet kështu, mor aman, se s’po dimë nga ta kapim logjikën!
Po s’ka faj zonja, jo.
Kanë faj ata që ngritën në nivel kaq të lartë institucional forume që duhej të ishin thjesht konsultative pranë Zyrës së Prokurorit të Përgjithshëm.
I kanë bërë organe kushtetuese me salltanete, paga e privilegje në nivel të lartë, dhe tani kërkojnë personel për të menduar si profesionistë!
Posi, posi… Your Royal Highness!
Mirë e ka, fundja!
Le ta shohin vetë ata që e shpikën këtë “mrekulli” të KLP-së si organ kushtetues — me përbërje, me mandat, me rrogë të plotë.
Ta gëzojnë shpikjen!
Dhe, urgjentisht, t’i japin edhe buxhet e personel, se zonja s’mendon dot pa to!
