Nga Adriatik Doçi
Në 4 nëntor 2008, zonja Ina Rama, në atë kohë në funksionin e Prokurorit të Përgjithshëm, i propozon Bamir Topit, asokohe President, emërimin e Ols Dados prokuror në Progradec.
Propozimin e saj, zonja Rama e mbështet në nenin 149 pika 3 të Kushtetutës dhe në nenin 8, pika 2, germa ‘b’ të ligjit nr. 8737 datë 12. 02. 2001 për organizimin dhe funksionimin e prokurorisë (i pa ndryshuar deri ditën e firmosjes së këtij propozimi). Mbështetur në të njëjtën bazë ligjore, Presidenti Bamir Topi, në 17 nëntor 2008, miraton propozimin e Ina Ramës, duke dekretuar emërimin e Ols Dados prokuror në Pogradec.
Neni 17 i ligjit, përpos të tjerave, parashikonte që mund të emërohet prokuror shtetasi që ka mbaruar Shkollën e Magjistraturës. Neni 18 parashikon që mund të emërohet prokuror edhe personi që nuk e ka mbaruar Shkollën e Magjistraturës, por që ka punuar jo më pak se tre vjet pedagog në Shkollën e Magjistraturës, në Fakultetin Juridik, këshilltar ligjor, drejtues ose specialist në strukturat juridiko-profesionale në Kuvend, Presidencë, qeveri, Gjykatën e Lartë, Ministrinë e Drejtësisë, Avokatin e Popullit, deputet me arsim juridik dhe oficer i policisë gjyqësore.
Ols Dado nuk plotësonte as kriteret e parashikuar në nenin 17 dhe as në nenin 18 të ligjit nr. 8737 datë 12. 02. 2001 për organizimin dhe funksionimin e prokurorisë. Dado kishte vetëm arsimin juridik dhe nuk kishte punuar 3 vite në një nga funksionet e parashikuara nga neni 18 i ligjit.
Më konkretisht, karriera e Ols Dados para se të bëhej prokuror është kjo:
Nga 16.12.1995 – 15.2.1996, punonjës pranë Ministrisë së Punës, Çështjeve Sociale e Shanseve të Barabarta. 16.2.1996 – 10.9.1996, punonjës pranë “A.M.C” sh.a. 29.1.1997 – 8.11.2000, punonjës pranë Bashkisë Durrës. 9.11.2000 – 30.6.2003, nuk punoi. 1.7.2003 – 29.9.2005, punonjës në ish-Komisionin e Letrave me Vlerë. 2005 – 2008, ka punuar si noter.
Në propozimin e zonjës Ina Rama theksohet “Ols Dado, me arsim të lartë juridik’. Arsimi i lartë juridik është vetëm një nga kriteret dhe si i tillë (i veçuar) është pamjaftueshëm për t’u emëruar prokuror, ndryshe të gjithë juristët dhe noterët do bëheshin prokurorë.
Çfarë e ka shtyrë Ina Ramën të angazhohej për të kapërcyer ligjin për katapultimin e Ols Dados prokuror? Po Bamir Topi pse ka pranuar një propozim në kundërshtim me ligjin? Çfarë duhet bërë me mandatin e Ols Dados në SPAK?
Përgjigja u takon organeve të drejtësisë së re, ILD, KLP, SPAK dhe Gjykatës Kushtetuese. ‘Koka në rërë’, ‘një sy qorr’ dhe ‘një vesh shurdh’ zbeh besimin te drejtësia.
—-
Teksti dhe faksimilet, nga faqja e autorit në FB
