Deputetja e PS-së Ermonela Felaj ka shpjeguar vendimin e grupit parlamentar socialist që injoroi për të dytën herë Gjykatën Kushtetuese për çështjen Xhaçka.
Felaj tha se Gjykata kushtetuese tentoi që t’i japë të njëjtën fuqi edhe pakicës.
“Ka çaluar diçka që nuk jemi kuptuar drejt për çështjen Xhaçka. Dy qëndrimet e fundit të shprehur me votë në Kuvend i referohen një diskutimi që ne kemi mbajtur në këshillin e legjislacionit dhe diskutimi ka qenë tërësisht profesional dhe i lidhur me kushtetutën. Është çështje kushtetuese edhe duhet të kuptonin drejt se çfarë kanë dashur të thonë edhe gjyqtarët për çështjen Xhaçka. Pakica që vë në lëvizje Gjykatën Kushtetuese është 1/5, ndërkohë pakica 1/10 që është më e vogël se 1/5 nuk ka të njëjtën fuqi kushtetuese siç kushtetua ia ka njohur kësaj pakice. Ne thirrëm edhe ekspertin e njohur të së drejtës kushtetuese kreshnik loloçin. Opozita e legjitimoi pyetjen e këtij eksperti dhe një nga konstatimet e ekspertit ishte që Gjykata Kushtetuese ka një lloj tejkalimi se pse Gjykata Kushtetuese ka tentuar t’i japë të njëjtën fuqi të vënies në lëvizje të saj edhe pakicës 1/10 duke e barazuar atë më 1/5? Gjykata Kushtetuese nuk mund të bëjë normë, por interpreton normat e organit ligjvënës dhe ky ka qenë debati kushtetues e juridik që kemi zhvilluar në Këshillin e Legjislacionit dhe sallën e votimit. Ne na intereson që ta zgjidhim deri në fund këtë debat dhe ne kuptuam që ka një qëndrim aty brenda për të barazuar këto pakica”, citon A2 deputetn socialiste.
Në studione A2 ajo tha seGjykata Kushtetuese ka fuqi interpretimi, por jo të bëjë ligj dhe në këto kushte sipas Felajt, vendimi më i drejtë është që merret mendimi i Komisionit të Venecias.
“Gjykata Kushtetuese i është dhënë fuqia e të interpretuarit, por jo të bëjë ligj dhe rruga më e drejtë është të marrim vendimin më të drejtë në fushë. Edhe vetë Gjykatat Kushtetuese i drejtohen Komisionit të Venecias për të marrë një mendim. Në çështjet e konflikti të interesit kuvendi jo automatikisht shkon në Gjykata Kushtetuese, sepse Kuvendi ka të drejtë ta shqyrtojë në pamje të parë dhe ne e kemi kryer këtë gjë. Në momentin që është ballafaquar në kushtetuese, Gjykata Kushtetuese ka mbajtur qëndrim tjetër. Është shumë e nevojshme të kemi një qëndrim të Komisionit të Venecias”.
Maxhoranca socialiste mbrojti më 13 shtator me votë kolegen Olta Xhaçka duke mos miratuar mocionin e 1/10 së deputetëve të Kuvendit të Shqipërisë për dërgimin në Kushtetuese të kërkesës për papajtueshmëri mandati.
Në momentin e votimit, 25 deputetë demokratë votuan pro, ndërsa 9 socialistë kundër. 65 të tjerë shtypen butonin e abstenimit duke bërë që projektvendimi të mos merrte votat e nevojshme për miratim.
Kuvendi i Shqipërisë ka përgatitur një kërkesë Komisionit të Venecias për të marrë një opinion në lidhje me vendimin për të mos dërguar në Gjykatën Kushtetuese kërkesën për papajtueshmëri mandati të deputetes Olta Xhaçka.
