Roberto Mancini ka treguar për herë të parë se pse u tërbua me Mario Balotellin më 2013, kur të dy ishin te Manchester City. Gjatë një seance stërvitore, trajneri u kap nga kamerat teksa e mbërtheu për rrobash sulmuesin, aq sa u desh ndërhyrja e të tjerëve për t’i ndarë.
Për gazetën franceze L’Equipe, Mancini tregon: “Në një seancë stërvitore, u thashë lojtarëve të mos bënin ndërhyrje të forta kundër Gael Clichy, sepse ai sapo ishte kthyer nga dëmtimi. Dhe atëherë Mario i bëri një ndërhyrje të tillë. U tërbova fare”, tregon trajneri italian.
“E kapa nga jaka dhe doja ta shtyja, por është shumë i fortë fizikisht dhe nuk munda ta lëvizja vendit. Nga fotot duket sikur jemi zënë me grushta, por asgjë nuk ndodhi”.
Mancini tregon edhe arsyen pse Balotelli u kthye në Itali.
“U konfliktua me disa nga shokët e skuadrës për shkak të sjelljes, ndaj donte të kthehej në Itali. U zhgënjeva që donte të ikte, sepse mund të kishte bërë shumë më tepër në një kampionat të jashtëzakonshëm”.
Që nga botërori brazilian, Balotelli nuk ka luajtur më me kombëtaren italiane dhe Mancini thotë se sulmuesi është vetë fajtor.
“Nëse sot Mario nuk luan me Italianë, është faji i tij. Është e pabesueshme që ai nuk është titullar në sulmin e kombëtares. Ai është sulmuesi më i mirë italian i viteve të fundit. Shpresoj që Mario ta kuptojë se duhet të ndryshojë qëndrim e të mendojë vetëm për futbollin. Nuk është dhe aq e vështirë”.
Dailymail/d.i.
