Kombëtarja shqiptare ka nisur sot grumbullimin në kuadër të 4 ndeshjeve të Nations League, që luhen në shtator dhe tetor.
Trajneri Maran, pasi shpalli listën e kuqezinjve të grumbulluar për sfidat me Bjellorusinë, San Marinon dy herë dhe Finlandën, nis sot punën në terren me të tijtë.
Sulmuesi Rey Manaj, i cili doli në konferencë shtypi bashkë me mesfushorin Ylber Ramadani, theksoi mes të tjerash se objektivi është vendi i parë në grupin 1 të Ligës C. Ai u shpreh se Shqipëria e vërtetë do të duket në këto ndeshje.
“Miqësoret e fundit janë ndryshe nga ndeshjet që do të luajmë tani. Miqësoret vinin pas fundit të sezonit, me mendjen te pushimet. Plus vinim pas ndeshjes me Poloninë dhe ishim të mërzitur për mosarritjen e objektivit. Ekipi i vërtetë do të jetë ky që do të shohim në Nations League, ku shpresoj të bëjmë më të mirën për të arritur vendin e parë në grup. Objektivi është të futemi në Europian. Grupi vjen në një moment të mirë. Këto ndeshje do të na ndihmojnë shumë besoj, trajneri ka bërë një punë të mirë, ka ardhur me shumë dëshirë këtu.
Rivaliteti për formacionin? Është gjë e mirë për Kombëtaren. Vijmë nga një moment i mirë dhe kjo është në të mirën e ekipit. Mungesat e Brojës dhe Bajramit? Futbolli është me momente, çdo lojtar që vjen këtu duhet të japë më të mirën, ka vlerat e veta”.
Ndeshja e parë e Kombëtares shqiptare është ajo kundër Bjellorusisë, që luhet më 26 shtator në stadiumin “Air Albania”.
