Ish Ministri i Financave Arben Malaj, në një intervistë në studion e Zërit të Amerikës në SHBA tha se tendenca e disa kolegëve brenda PS për të mbytur debatin në parti është një aspekt mjaft negativ. Malaj mori në mbrojtje deputetin socialist Ben Blushi duke dalë kundër deklaratave të bëra se ky i fundit po përdor gjuhën e Berishës në akuzat e tij kundrejt mospasjes së zgjedhjeve për kreun e PS. Malaj i është referuar dhe një shprehje të përdorur nga Ilir Meta se qeverisja aktuale mes PS dhe LSI është një duet dhe jo një duel. Sipas Ish Minstrit nëse në partitë politike shqiptare, e veçanërisht në PS nuk ka debate, atëherë shumë shpejt duetet do të shndërrohen në trio.
“Më vjen keq që në debatin që bëhet nga disa deputetë të PS, këtë diskutim që bën Blushi arrijnë ta konsiderojnë si një investim të PD, si gjuha e Berishës, ose se kjo zhurmë në parti po na vë në dyshim qeverisjen e vendit. Në asnjë vend të botës debatet që bëhen brenda Partisë nuk e dëmtojnë qeverisjen e një vendi.
Unë besoj se është një proces i vështirë, fatkeqësisht trendi nuk ka qenë pozitiv në vitet e fundit. Duhet më shumë angazhim dhe përgjegjshmëri, më shumë kontribut.. Duke pritur që të modernizohen partitë ne do të shikojmë se nga duelet do të shkojmë në duete dhe nga duetet do të shkojmë në trio.
Unë besoj që rreziku për PS nuk janë debatet e brendshme por stërmundimi i kolegëve të PS për të mbyllur debatet e brendshme.”- tha Malaj.
Ai nuk e përjashtoi rikthimin në politikë dhe jo detyrimisht përmes Partisë Socialiste.
Malaj foli gjithashtu edhe për ekonominë në vend dhe partneritetin e ri publik privat për mbledhjen e TVSH-së. Ai ka ardhur në Uashington për të marrë pjesë në ceremonitë tradicionale “Mëngjesi i Lutjeve” që zhvillohen çdo vit në kryeqytetin amerikan.
