Ivana Lisette Ortiz, e dyshuar për sulmin me armë në shtëpinë e Rihannës në Kaliforninë Jugore, mund të përballet me burgim të përjetshëm nëse shpallet fajtore.
Zyra e Prokurorit të Distriktit të Los Angeles bëri të ditur se Ortiz akuzohet për tentativë vrasjeje, 10 raste sulmi me armë dhe tri akuza për të shtëna me armë në një banesë ose shtëpi të lëvizshme, raportoi “Daily Mail”.
Prokurori i Distriktit të Los Angeles, Nathan J. Hochman, e cilësoi të shtënat drejt një banese si krim të rëndë dhe të dhunshëm. Ai theksoi se njerëzit duhet të ndihen të sigurt në shtëpitë e tyre dhe në zonat përreth.
Ortiz, e cila vjen nga Orlando, Florida, është deklaruar e pafajshme. Garancia për lirimin e saj është caktuar në 2.65 milionë dollarë, ndërsa paraqitja e radhës në gjykatë është planifikuar më 29 tetor.
Të shtënat ndodhën pasditen e 8 marsit. Sipas dyshimeve, Ortiz shkoi me makinë te banesa e Rihannës dhe hapi zjarr disa herë me një pushkë sulmi.
Gjatë incidentit, Rihanna, 38 vjeçe, ishte në një rimorkio në oborr bashkë me partnerin e saj, A$AP Rocky. Tre fëmijët e tyre ndodheshin në dhomën e gjumit, ndërsa në shtëpi kishte edhe persona të tjerë.
Informacionet e publikuara tregojnë se, para ngjarjes, Ortiz kishte shpërndarë në rrjetet sociale video ku fliste me agresivitet për Rihannën dhe shfaqte një fiksim ndaj këngëtares.
