La Liga ka tashmë një plan të qartë për rifillimin e kampionatit. Ka konfirmuar gjithçka presidenti i ligës spanjolle të futbollit Javier Tebas megjithatë që rinisja e sezonit të marrë formë zyrtare duhet konfirmimi i Ministrisë Spanjolle të Shëndetsisë. Plani i numrit 1 të ligës së futbollit Tebas është që edicioni 2019-2020 i La Ligas të rifillojë më 11 qershor dhe të përfundojë në datën 19 korrik.
Një tur force prej 39 ditësh ku do të ketë ndeshje çdo ditë pa ndërprerje. Gjithçka do të rinisë ditën e enjte në datë 11 qershor me derbin e Andaluzisë ndërmjet Real Betis dhe Sevillas. Po në datë 11 do të luhen edhe minutat e mbetura të ndeshjes së ndërprerë të La Liga 2 mes Rayo Vallecanos dhe Albacetes.
Në këtë mënyrë nga 11 qershori do të ketë ndeshje çdo ditë, sfida të cilat do të luhen në tre fasha oraresh 19:30, 21:30 ose 22:00, ndërsa në fundjavë do të shtohet edhe një orar i ri ai 17:30. Deri në fund të këtij sezoni janë për t’u luajtur edhe 11 raunde me Barcelonën që aktualisht kryeson kampionatin me 2 pikë avantazh ndaj Realit të Madridit. Mësohet se nga ky pushim kaq i gjatë dëmet financiare janë tepër të mëdha, fatura financiare shkon në 700 milione euro.
g.kosovari