Një operacion antidrogë mes policisë shqiptare dhe asaj greke, ka goditur një rast i trafikut ndërkombëtar të lëndëve narkotike, duke vënë në pranga një person.
Policia Kufitare e Igumenicës në bashkëpunim me Antidrogën, kanë marrë njoftim nga Policia Kufitare e Sarandës, se efektivët e Policisë Kufitare Sarandë janë vënë në ndjekje të disa personave që dyshohej se po transportonin lëndë narkotike nëpërmjet kufirit jeshil, ku në tokën greke do i priste një automjet.
Rreth orës 08.00 të mëngjesit të sotëm, në vendin e quajtur Sajadhe, Igumenicë, policia greke ka ndaluar për kontroll mjetin me targa IPA 4427 me drejtues shtetasin grek Panajotis Petropullos, 71 vjeç, banues në Athinë, i cili u arrestua në flagrancë.
Nga kontroll i mjetit u konstatua se kishte ngarkuar lëndë narkotike kanabis sativa.
Nga peshimi rezultoi se lënda narkotike ishte paketuar në 57 pako, me peshë totale 94 kilogramë e 720 gramë.
Aktualisht vijojnë hetimet e përbashkëta për zbardhjen e plotë të këtij rasti të trafikut të lëndëve narkotike, si dhe për identifikimin dhe kapjen e shtetasve shqiptarë që transportuan me krahë lëndë narkotike nëpërmjet kufirit jeshil.
/b.d
