Situata që po ndodh ditën e sotme në Kumanovë të Maqedonisë, ka sjellë reagime edhe nga politika shqiptare. Fillimisht ka qenë deputeti socialist Pandeli Majko i cili e ka cilësuar këtë tension në Kumanovë si “sallata maqedonase” të cilët po e vuajnë shqiptarët.
Edhe Partia Demokratike ka reaguar duke dënuar sulmet e armatosura dhe shprehur se dhuna është mënyra e gabuar për të zgjidhur problemet. Edhe ish-kryeministri Berisha ka bere thirrje qe te ndalet dhuna ne Kumanove.
Ndërsa sipas PDIU-së tensioni i ditës së sotshme sjell në vëmendje situatën në Maqedoni në vitet 1980-2000.
Majko: Shqiptarët po paguajnë “sallatën maqedonase”
Deputeti socialist Pandeli Majko ka dënuar ashpër ngjarjet e fundit në Maqedoni. Në një postim në Facebook, Majko shkruan se kriza po merr përmasa midis një pale që nuk po qeveris dot dhe një pale që nuk e merr dot pushtetin.
Sipas Majkos shqiptarët janë ata që po paguajnë me çmim të lartë në mënyra të ndryshme “sallatën maqedonase”.
“Me shqetesim po ndjek situaten ne Maqedoni. Ne kete shtet e ke te veshtire te besh dallimin midis operacionit “policor” dhe atij ushtarak. Shkupi eshte i denuar te prodhoje ose dialog ose te kundertin e vet si nje shembull rajonal per mire ose keq. Kjo qe po ndodh aktualisht eshte shqetesuese pasi qeverisja e rraskapitur e Shkupit po shkon ne drejtim te paditur. Ne Maqedoni kriza po merr permase midis nje pale qe nuk po qeveris dot dhe nje pale qe nuk e merr dot pushtetin. Ne mes jane shqiptaret qe po paguajne me cmim te larte ne menyra te ndryshme “sallaten maqedonase”. shkruan Majko
PD: Dhuna rruga e gabuar
“Partia Demokratike po ndjek me shqetësim të thellë situatën në Maqedoni në zonën e Kumanovës. Lajmet se si pasojë e konfliktit kanë humbur jetën disa persona, midis tyre edhe fëmijë, janë thellësisht tronditëse. Fakti se konflikti po zhvillohet në një zonë të populluar mbart rrezikun e lëndimit apo dëmtimit të civilëve të tjerë. Dhuna dhe mjetet e forcës janë rruga më e gabuar për të zgjidhur problemet.Partia Demokratike u bën thirrje autoriteteve maqedonase të garantojnë jetën dhe pronën e popullatës civile. Përdorimi disproporcional i forcës është i dëmshëm. Partia Demokratike i kërkon popullatës shqiptare dhe faktorit politik shqiptar në Maqedoni, të ruajnë gjakftohtësinë dhe të shmangin provokimet. Stabiliteti dhe integrimi Euroatlantik i Maqedonisë është interes jetik i qytetarëve të saj. Respektimi i plotë i marrëveshjes së Ohrit është një rrugë e sigurtë drejt këtij qëllimi.”
Berisha: Te ndalet dhuna dhe terrori shteteror ne Kumanove!
“Te ndalet dhuna dhe terrori shteteror ne Kumanove! Te dashur miq, ne oret e para te mengjesit, njesi te blinduara te policise se Maqedonise kane vene papritmas ne shtetrrethim dhe sulmuar me arme automatike, mitroloza, granatahedhse nje lagje te Kumanoves qe banohet krejtesisht nga shqiptaret. Nderkohe qe autoritetet maqedonase nuk japin te dhena, mediat e ndryshme dhe deshmitar nga vendngjarja informojne per vrasje te disa civilve te pafajshem, femije 8 vjeç, gra, te moshuar dhe shume te tjere te plagosur, çka deshmon per krime te shemtuara shteterore ndaj popullesise civile shqiptare ne kete qytet. Shkaqet e ketij sulmi policor te njesive te blinduara te policise se Maqedonise jane ende te paqarta. Natyrisht element delinkuent mund te kete dhe ne lagjen e sulmuar por asgje nuk perligj dhe nuk justifikon kurre terrorin vrasjet e njerezve te pafajshem. Duke shprehur ngushellimet me te sinqerta familjeve te viktimave, denoj me ashpersine me te madhe kete terror shteteror te eger te autoriteteve maqedonase dhe kerkoj nderprerjen e menjehershme te dhunes dhe terrorit ne Kumanove si dhe vendosjen para ligjit te gjithe autoret, organizatoret e krimeve te shemtuara ndaj popullates shqiptare civile te Kumanoves. Ju bej thirrje qytetareve te Kumanoves te ruajne gjakftohtesine, te shmangin cdo provokim, akt tjeter destabilizues per qytetin e tyre!”
PDIU: Tensioni i krijuar si në vitet 1980
“Partia Drejtësi, Integrim dhe Unitet dënon ashpër dhunën e orëve të fundit në Kumanovë dhe shpreh shqetësimin e saj për përshkallëzimin e situatës, e cila ka shkaktuar viktima dhe të plagosur. Ekstremizmi i kohëve të fundit në Maqedoni po ringjall një situatë tensioni të ngjashme me protestat e viteve `80, `93 dhe 2000, ku sërish qeveritë e vendit fqinj tentonin t’i diskriminonin shqiptarët dhe t’i pasqyronin si fajtorë, për të shmangur vëmendjen e opinionit publik nga problemet e tyre të brendshme. Dhuna ndaj shqiptarëve në Maqedoni, në një kohë kur qeveria Gruevski gjendet përballë skandaleve të njëpasnjëshme politike, rrëfen edhe një herë mentalitetin anakronik të drejtuesve kryesorë të shtetit fqinj. Përdorimi i përplasjeve etnike për të shmangur vëmendjen nga këto skandale, është i papranueshëm dhe i dënueshëm. PDIU i bën thirrje urgjente qeverisë së Shqipërisë dhe qeverisë së Kosovës të përdorin çdo mjet diplomatik, për të vendosur qeverinë maqedonase përpara përgjegjësisë mbi këto akte të papranueshme. Po ashtu, elita politike shqiptare në Maqedoni e ka detyrim kombëtar që të heqë dorë nga kalkulimet e ngushta politike për interesa dhe të bashkohet në unison për të mbrojtur të drejtat e shqiptarëve të atyshëm dhe rrjedhimisht për ruajtjen e integritetit territorial të Maqedonisë.”
Redaksia Online
(JavaNews.al)