Ambasadori i Bashkimit Evropian në Shqipëri, Silvio Gonzato, theksoi nevojën për një ndryshim të mendësisë në institucionet e drejtësisë, gjatë fjalës së mbajtur në Konferencën “Ndërveprimi i Drejtësisë me Median”, përballë magjistratëve të rinj.
Sipas Gonzatos, reforma në drejtësi nuk mund të mbështetet vetëm te ndryshimet ligjore, por kërkon edhe një transformim të kulturës institucionale dhe të mënyrës së të menduarit të atyre që shërbejnë në sistem.
“Ju po bëheni pjesë e këtij profesioni në një moment tejet kyç për historinë e sistemit të drejtësisë shqiptar. Shumë gjëra kanë ndryshuar, tashmë kemi standarde të reja dhe pritshmëria e qytetarëve shqiptarë është rritur. Institucionet nuk krijohen vetëm nga ligjet, kërkojnë ndryshim kulture, mendësie të atyre njerëzve që punojnë në këto institucione. Unë nuk jam i bindur që është arritur ky ndryshim mendësie. Ndonjëherë ka një hezitim për të pranuar natyrën kolegjiale të disa vendimeve që janë të rëndësishme dhe që duhet të marrin institucionet e drejtësisë. Tashmë është në dorën tuaj që të arrini atë pritshmëri që drejtësia të ofrohet në kohë dhe me cilësi të lartë dhe brezi juaj duhet të mishërojë këtë kulturë”, tha ai.
Ambasadori i BE-së u ndal edhe te rëndësia e pavarësisë së gjyqësorit, duke u bërë thirrje magjistratëve të mos ndikohen nga presionet e jashtme, përfshirë ato që vijnë nga rrjetet sociale apo media.
“Nuk duhet të harroni rëndësinë që ka një vendim i pavarur, që merret pavarësisht presioneve të jashtme që mund të vijën nga rrjete sociale apo edhe nga vetë media. Është e rëndësishme të kemi një vendim të mirë arsyetuar. Zbatimi i reformës në drejtësi mund të fuqizohet vetëm përmes vendimeve që merren çdo ditë me integritet dhe asnjë ligj, sado i mirë, nuk mund të zëvendësojë këtë vullnet”, theksoi ai.
Në përfundim, Gonzato rikonfirmoi angazhimin e Bashkimit Evropian për të mbështetur sistemin shqiptar të drejtësisë, duke e konsideruar investimin te brezi i ri i magjistratëve si një garanci për forcimin e shtetit të së drejtës.
“Bashkimi Europian do të vazhdojë të mbështesë të gjithë sistemin e drejtësisë në Shqipëri. Ne besojmë se të investosh në brezat e ardhshëm të magjistratëve është një nga investimet më të forta që mund të bëjmë për të ardhmen e sundimit të ligjit në Shqipëri”, përfundoi ambasadori i BE.
