Bashkëkryetari i Lëvizjes për Zhvillim Kombëtar, z. Ekrem Spahiu, është shprehur se era e ndryshimit që ka nisur me fitoren e Donalt Trump në SHBA, por përhapet me fitoren e partive të djathta kudo në Europë dhe sipas tij, ka ardhur momenti që ndryshimi të vij edhe në Shqipëri.
Komentet Spahiu i bëri në një konferencë për media, ku LZHK dhe ‘Djathtas 1912’ firmosën marrëveshjen për krijimin e koalicionit për zgjedhjet e 11 majit.
Spahiu tha se oferta e tyre politike është më seriozja dhe demokratikja, pasi sipas tij, ky koalicion deri më tani është i vetmi ndër subjektet garuese politike të 11 majit, që do të futet në zgjedhje me lista të hapura.
Ai shtoi gjithashtu se të gjithë kandidatët për deputetë të këtij koalicioni përfaqësojnë të djathtën reale dhe vijnë nga origjina politike e djathtë.
“Shumica e shqiptarëve kërkojnë një ndryshim. 12 vjet janë të tejkaluara që PS të drejtojë qeverinë shqiptare. Në SHBA, Itali, Greqi, Francë, dje edhe në Gjermani dhe kudo në Europë partitë e qendrës së djathtë po fitojnë. Edhe në Shqipëri është i domosdoshëm ndryshimi.
Kjo është një mundësi më shumë që shqiptarët të kenë një alternativë tjetër të mirëfilltë të djathtë. Të gjithë individët që do të jenë kandidat për deputetë në koalicionin tonë, janë në origjinë politike të djathtë dhe përfaqësojnë të djathtën reale. Shqiptarët kanë mundësi të bëjnë ndryshimin e tyre.
Në Itali koalicioni i djathtë qeveris, po ashtu edhe në vende të tjera. Atëherë çfarë të keqe ka që dhe në Shqipëri të jënë 2-3 parti në qeverisje? Ne kemi parimin më demokratik. Lista e Hapur të dalë para shqiptarëve dhe seleksionimin do e bëjnë votuesit dhe pastaj do të ndërtohet një qeveri. Absolutisht ne jemi parim demokratik”, tha zoti Spahiu.
