Përmes deputetit Piro Lutaj, PS i ka bërë thirrje prokurorisë që të nisë hetimet për deputetin demokrat Flamur Noka, pasi ai, sipas selisë rozë, ka fshehur të dhënat në formularin e vetëdeklarimit dhe në këtë mënyrë ka shkelur ligjin, i cili e dënon këtë vepër nga 6 muaj në 4 vite burg.
Ditën e djeshme PS ka depozituar në Prokurorinë e Përgjithshme një kërkesë për fillimin e hetimit, nën akuzën e falsifikimit të dokumentave.
“Prokuroria e Përgjithshme sipas afateve që ka parashikuar ligji të fillojë sa më shpejt hetimin dhe verifikimin, lidhur me këtë rast, i cili në vlerësimin e 25 deputetëve firmëtarë të Kuvendit të Shqipërisë, përfaqësues të Grupit Parlamentar të Partisë Socialiste, përbën vepër penale pasi në formularin e vetëdeklarimit përkatësisht në pikën 5 dhe pikën 7 të tij, deputeti Noka nuk ka deklaruar të dhëna të rëndësishme që lidhen me ndalimin dhe dëbimin nga një shtet i huaj. Bëhet fjalë për dëbimin nga Jugosllavia e atëhershme. Prokuroria duhet që të fillojë menjëherë verifikimin dhe hetimin për shkeljen e nenit 190 të Kodit të Procedurës Penale, i cili parashikon dënimin me burg nga 6 muaj deri në 4 vjet.
Kjo është një procedurë që ne do ta ndjekim dhe për disa raste të tjera, deputetë apo përfaqësues të qeverisjes vendore, të Partisë Demokratike, rreth të cilëve dua të them, se është mbledhur i gjithë informacioni i nevojshëm.
Partia Socialiste nëpërmjet deklaratave për shtyp, nuk ka për qëllim të shpallë fajtorë askënd, por të insistojë për zbatimin e ligjit, ndërkohë neverisim me përbuzje qëndrimin e përfaqësuesve të Partisë Demokratike dhe këllëfëve të saj, lidhur me demagogjinë për dekriminalizimin e politikës. Ne i bëjmë thirrje Partisë Demokratike që ajo të jetë jo vetëm pjesëmarrëse në këtë proces por edhe kontribuese e te tregoje qe di te zbatoj ligjin qe vetë e kërkoi, vetë e hartoi dhe e miratoi bashkë me ne. Është shumë e rëndësishme që ky proces i cili sapo ka filluar të vazhdojë me seriozitet… Dhe ne, jemi duke ushtruar të drejtën tonë ligjore për të ndjekur çdo rast, në zbatim të këtij ligji”, tha Lutaj. java/ a.k
