Paçka se mbi kurrizin e tij rëndon një akuzë për shpërdorimet e Rrugës së Kombit kur ishte ministër, Kryetari i opozitës në Shqipëri po kërkon të bllokohet tarifa e mirëmbajtjes. Rruga e Kombit pati një shpenzim marramendës prej 1.3 miliardë euro dhe ka një kosto për ta përfunduar deri në 200 milione euro, por ko s’i mjafton atij të bëj të mirin.
Kreu i Partisë Demokratike Lulzim Basha ka takuar sot kryetarin e komunës së Mitrovicës, Agim Bahtiri ku ka kërkuar që të lehtësohet sa më shumë komunikimi dhe të lehtësohet sa më shumë kosto e shkëmbimeve tregtare dhe ekonomike midis Shqipërisë dhe Kosovës.
Basha tha se është informuar nga zyrtari kosovar për zhvillimet e fundit dhe se i ka dhënë mbështetjen totale, përpjekjeve të tij dhe të lidershpit të Kosovës për të përparuar me objektivin e popullit dhe objektivi i Europës dhe partnerit Strategjik, Shteteve të Bashkuara të Amerikës, për bashkimin e Mitrovicës në të gjitha senset.
Deklarata e plote e kreut te PD
Kryetari i komunës së Mitrovicës, zoti Bahtiri më ka informuar mbi zhvillimet në Mitrovicë dhe në Kosovë, të cilat natyrisht unë i ndjek me vëmendje të madhe. E kam përgëzuar për punën e jashtëzakonshme që ka bërë, në veçanti në përparimin e përditshëm për largimin e barrierave që i ndajnë qytetarët e Mitrovicës dhe në investimet e përkushtimin e tij për zhvillimin ekonomik dhe krijimin e shanseve për punësim në Mitrovicë dhe në veçanti për rininë.
Po kështu i kam shprehur vendosmërinë time dhe të Partisë Demokratike, për të bërë gjithçka që asnjë pengesë e re mos të vendoset midis Shqipërisë dhe Kosovës, port ë hiqen pengesat ekzistuese. Të lehtësohet sa më shumë komunikimi dhe të lehtësohet sa më shumë kosto e shkëmbimeve tregtare dhe ekonomike midis Shqipërisë dhe Kosovës dhe pjesë e padiskutueshme e kësaj është përkushtimi i Partisë Demokratike që të mos ekzistojë asnjë taksë, asnjë tarifë shtesë për rrugën e Kombit. Jo më kot takimin e kemi bërë në prani edhe të kryetarit të bashkisë së Kukësit, zotit Shehu.
Nga ana tjetër i kam dhënë mbështetjen totale, përpjekjeve të tij dhe të lidershpit të Kosovës për të përparuar me objektivin e popullit të Kosovës, që besoj se po kështu është edhe objektivi i Europës dhe partnerit tonë Strategjik, Shteteve të Bashkuara të Amerikës, për bashkimin e Mitrovicës në të gjitha senset.
Një bashkim ekonomik, social i cili do t’i japë fund manipulimit politik që i është bërë tash 18 vjet kësaj ndarje të padrejtë dhe për të hapur së bashku me gjithë qytetarët e Mitrovicës, shqiptarët por edhe serbët, një kapitull të ri të një Kosove që funksionon dhe përparon e bashkuar drejt një qëllimi, Kosovës europiane, Kosovës euroatlantike si garanci dhe hipotekë për stabilitetin rajonal dhe për të ardhmen europiane të të gjithë vendeve të rajonit, përfshirë Serbinë.
