Kryetari i Partisë Demokratike ka folur për herë të parë pas shumë akuzave që po i bën grupimi anti-Basha brenda PD-së, të cilët kërkojnë dorëheqjen e tij.
Por Lulzim Basha nuk është shprehur për këtë edhe pse ka pasur kritika të shumta.
Përmes një statusi në facebook Basha ka vendosur të “bëhet i gjallë” dhe shkruan për lulishten pranë parkut të autobuzave.
Postimi i Bashës
Lulishtja pranë parkut të autobuzave ishte një nga investimet e mia si kryebashkiak në shërbim të qytetarëve të një prej zonave më të populluara të Tiranës.
Erjon Veliaj, vegël e bindur në duart e oligarkisë që sundon vendin, e shkatërroi këto ditë lulishten dhe lejoi betonizimin e saj në favor të Besnik Sulajt, klientit të rëndësishëm të Edi Ramës.
Qytetarëve të revoltuar ata iu përgjigjën dje me dhunën e policisë.
Edhe më i rëndë qe dhunimi i të drejtave të qytetarëve nga mediat kryesore të vendit të kontrolluara nga oligarkia, të cilat e fshehën protestën dhe dhunën e policisë.
Ndërkohë, Shqipëria po përjeton këto ditë mungesë dritash dhe uji sepse paratë publike u përdorën për të manipuluar votën dhe jo për të blerë energji për njerëzit.
Pushteti oligarkik herët a vonë degjeneron në pushtet të dhunës dhe të errësirës.
Përballja me të është sot sfida kryesore e opozitës dhe e të gjithë njerëzve të ndershëm për të ndalur rrënimin e qyteteve, të ekonomisë dhe të ardhmes tonë. /b.d
