Nga Bledi Lumani
Lulzim Basha ka shpërthyer në mënyrë të pashembullt ditën e sotme.
Ai ka bërë thirrje publike që të tërhiqet zvarrë, drejtori i RTSH-së, Thoma Gëllçi.
Thirrja e tij përballë një turme të eksituar, mund të bënte që Thoma Gëllçi të tërhiqej vërtetë zvarrë.
Zyra e tij është vetëm pak metra larg çadrës së protestës së PD-së dhe ndonjë kokshkretë mund ta kishte marrë seriozisht thirrjen e Bashës dhe të drejtohej për nga RTSH.
Fundja kjo nuk është gjë e re.
E kanë bërë edhe në ’98-n, kur e sulmuan me antitank RTSH-në dhe i vunë zjarrin.
Por çfarë ka bërë Thoma Gëllçi, që të tërhiqet zvarrë?
Lulzim Basha thotë se ka pushuar një punonjëse, dhe për këtë arsye e meriton të “kryqëzohet”.
Ok!
Po me një njeri që ka bërë edhe më keq se kaq, çfarë duhet të bëjmë?
Fjala vjen, çfarë duhet t’i bëjmë Lulzim Bashës, që akuzohet se ka shpërdoruar 220 milionë euro të shqiptarëve dhe i është shmangur gjykimit?
Çfarë duhet t’i bëjmë atij, për akuzën e vrasjes së katër qytetarëve që protestonin para Kryeministrisë?
Po për lejet e pafundme të ndërtimit kundrejt përfitimit në Bashkinë e Tiranës?
Po Berishës, Bodes, Rulit, Ristanit, Nokës etj, që protestojnë krah tij, çfarë duhet t’iu bëjmë për gjithë akuzat që rëndojnë mbi ta?
T’i tërheqim zvarrë?
Sipas logjikës së Bashës, po.
Madje edhe më keq.
Sepse nëse Thoma Gëllçi thjesht ka pushuar nga puna një punonjëse, këta kanë vrarë njerëz e kanë vjedhur sa kanë dashur!
Ndaj, kur Basha bën thirrje për tërheqje zvarrë, ndoshta bën mirë ta marrë shtruar!
Se mund ta fillojnë nga ai!/Tema
