Për tetë vite me radhë, Lulëzim Berisha u përball me një proces të tejzgjatur gjyqësor, ku ai akuzohej si drejtues i një bande kriminale, që kishte operuar në aksin Durrës-Tiranë gjatë viteve 1998-2002.
Në përfundim të gjykimit të dosjes në ngarkim të tij dhe 15 të bashkëpandehurve, në Shkallën e Parë, më 16 janar 2012, ai u dënua me burgim të përjetshëm. Ky vendim u la i pandryshuar për të akuzuarin Berisha në Apelin e Krimeve të Rënda muajin korrik të të njëjtit vit. Kthesë të fortë në masën e dënimit të tij shënoi vendimi i Gjykatës së Lartë, i shpallur më 16 korrik 2014. Një Kolegj Penal i Gjykatës së Lartë vendosi prishjen e vendimit të Apelit për Krimet e Rënda në lidhje me të pandehurin Lulzim Berisha, duke e dënuar atë përfundimisht me 25 vjet heqje lirie.
Sipas Prokurorisë për Krimet e Rënda, grupimi kriminal i cilësuar si “banda e Durrësit” fillimisht është formuar si rrjedhojë e bashkimit të dy grupimeve të personave me precedentë penalë, që drejtoheshin respektivisht nga Lulëzim Berisha e Klodian Saliu.
Më pas, pas vrasjes së Klodian Saliut në shkurt 2005, të pandehurit Endrit Dokle e Adriatik (Dritan) Coli vendosin të kundërpërgjigjen duke vrarë kundërshtarin e tyre, të pandehurin Lulzim Berisha. Ndaj
Berishës janë realizuar disa atentate, të gjitha të dështuara.
PSE RA BURGIMI I PERJETSHEM
Në vendimin e plotë të Gjykatës së Lartë, i përbërë nga 448 faqe në total, Kolegji Penal arsyeton se Shkalla e Parë dhe Apeli për Krimet e Rënda ka gabuar duke zbatuar në mënyrë të padrejtë ligjin penal të kohës kur kanë ndodhur tri episode kriminale, në të cilat Lulëzim Berisha akuzohej të kishte konsumuar akuzën e “vrasjes me paramendim”.
Sipas Gjykatës, duke iu referuar ligjit të kohës, si ligji më i favorshëm për të gjykuarin Lulzim Berisha, duke iu referuar rrethanave të faktit, provave dhe akuzave që janë ngritur ndaj tij, ekzistonte vetëm një rrethanë rënduese.
“Kolegji Penal i Gjykatës së Lartë, në ndryshim nga gjykatat e faktit, vlerëson se, në periudhën e kryerjes së veprave penale nga i gjykuari Lulzim Berisha, tetor 1998 – gusht 1999, ka ekzistuar vetëm një rrethanë rënduese, që është ajo e parashikuar nga germa ‘gj’ e nenit 50 të Kodit Penal të kohës së kryerjes së veprave penale dhe që është ‘kryerja e veprës penale në bashkëpunim’”, arsyetonte Gjykata e
Lartë.
Më tej, Gjykata shprehej që duke qenë se i gjykuari Lulzim Berisha është akuzuar nga Prokuroria për kryerjen e veprave penale, vetëm në prani të rrethanës rënduese të bashkëpunimit, gjykatat nuk mund të
dilnin në një konkluzion tjetër.
“Arsyetimi që bëjnë gjykatat e faktit që, sipas tyre, ekzistojnë disa rrethana rënduese në kryerjen e veprave penale, nga i gjykuari Lulzim Berisha, është haptazi i pabazuar në ligj, sepse, nuk mund të deklarohet fajtor një i gjykuar, pa pasur akuzë përkatëse, të ngritur nga Prokuroria edhe në lidhje me rrethanën rënduese konkrete, sepse cenohet në këtë mënyrë parimi kushtetues i të drejtës së mbrojtjes së të gjykuarit”, thuhej në vendimin e Gjykatës së Lartë.
Përfundimisht, Kolegji Penal i Gjykatës së Lartë konkludonte se për të pandehurin Lulzim Berisha duhet të zbatohej ligji përkatës i kohës, para ndryshimeve të pësuara në vitin 2001, ku “vrasja e kryer me paramendim dënohej me burgim nga pesëmbëdhjetë deri në njëzetepesë vjet burg.
“Përfundimisht, pas ndryshimit të pjesshëm të vendimit të Gjykatës së Apelit për Krime të Rënda, në aplikim të nenit 55 të Kodit Penal, në bashkim të dënimeve, dënimin e të gjykuarit Lulëzim Berisha me 25 vjet burgim”, thuhej në dispozitivin e vendimit në lidhje me të akuzuarin Berisha.
Panorama/d.i.
