Pas përfundimit të garës 3000 metra me pengesa, Luiza Gega ka shpjeguar në Facebook se nuk mund të bënte më tepër. Që para garës, shpresat për nënkampionen e Evropës ishin të vogla, për shkak të një dëmtimi të pësuar që një muaj më parë.
Gega shpjegon pikërisht dhimbjet e ardhura nga dëmtimi gjatë garës, të cilën deshi me çdo kusht ta çonte deri në fund.
“Gara që bëra sot, nuk ishte gara ime, kisha 1 muaj e dëmtuar në tendinë. Ajo që më penalizoi ishte pengesa te gropa e ujit, pasi aty më dhimbte shumë. Pas xhiros së dytë më kapi edhe ngërçi te gishtat e këmbës dhe u bë e pamundur të luftoja. Thjesht s’desha ta lë garën, sepse kurrë s’e kam lënë gjer më sot, sido që kam qenë”, shkruan Gega.
Atletja shqiptare u rendin e 16-ta midis 17 pjesëmarrëseve.
Vetë Gega i kishte paraprirë në një farë mënyrë rezultatit të sotëm, teksa tregonte për dëmtimin edhe dje, në një tjetër postim në Facebook, ku shkruante se nuk ishte në 100 përqind të formës dhe se po mendonte që tani për lojërat e ardhshme olimpike.
“Janë Lojërat e para Olimpike për mua dhe dua t’i shijoj në maksimum. Gjithsesi, sporti për mua nuk mbyllet këtu, Lojërat e ardhshme vijnë më shpejt se ç’i mendojmë dhe unë do të vij me synime shumë më të mëdha”, shkruante dje Gega, ndërkohë që sot ka shkruar edhe se nuk ndihet shumë e zhgënjyer me rezultatin, pasi e dinte që nuk mund të bënte më mirë, si shkak i dëmtimit.
d.i.
