Një pilot dhe një anëtar i ekuipazhit kanë humbur jetën pasi një helikopter zjarrfikës u rrëzua gjatë operacionit për shuarjen e një zjarri masiv në Utah, në Shtetet e Bashkuara.
Helikopteri i tipit Sikorsky S-64 “Skycrane”, i kontraktuar nga kompania Helicopter Transport Services në kuadër të një kontrate me Shërbimin Pyjor të SHBA-ve, u rrëzua rreth orës 10:00 të mëngjesit, sipas kohës lokale, të premten. Ngjarja ndodhi pranë qytetit Richfield, në zonën e rezervuarit Three Creeks, në jugperëndim të qytetit dhe pranë skajit juglindor të zjarrit Uidemouth 2.
Autoritetet thanë se kushtet ekstreme të zjarrit dhe terreni i pjerrët e kishin bërë situatën e vështirë. Trupat e viktimave u gjetën dhe u nxorën nga zona të shtunën. Identitetet e tyre nuk janë bërë ende publike.
Për shkak të përhapjes së zjarrit, autoritetet kanë urdhëruar evakuimin e banorëve në zonat e rrezikuara dhe kanë vendosur gjithashtu mbyllje të disa rrugëve.
Zëvendëskomandanti Tyler Hecht, tha se ekipet zjarrfikëse ndërmorën një “pauzë taktike” pas rrëzimit të helikopterit, në mënyrë që të riorganizoheshin dhe të vlerësonin situatën. Më pas, operacionet për luftën ndaj zjarreve rifilluan.
Guvernatori i Utahut, Spencer Cox, e cilësoi luftën kundër zjarreve në zonat pyjore si një nga punët më të rrezikshme në botë. Të shtunën në mbrëmje, Patrulla e Autostradave të Utahut organizoi një kortezh për të shoqëruar trupat e viktimave, të cilët u cilësuan nga autoritetet si “heronj”.
Zjarri Uidemouth 2 nisi më 27 korrik pasi një goditje rrufeje shkaktoi shpërthimin e flakëve në pyllin kombëtar Fishlake. Që prej atëherë, flakët janë përhapur në një sipërfaqe prej më shumë se 111 mijë hektarësh, ose rreth 45 mijë hektarë, duke u shndërruar në një nga zjarret më të mëdha të regjistruara në Utah këtë vit.
Sipas të dhënave të autoriteteve, deri të shtunën vetëm rreth 24 për qind e zjarrit ishte vënë nën kontroll. Situata mbetet e rrezikshme për shkak të sjelljes ekstreme të flakëve, përfshirë përhapjen e zjarrit në majat e pemëve dhe hedhjen e prushit në distanca të mëdha, çka vazhdon të kërcënojë komunitetet pranë zonës së prekur.
Ky është incidenti i dytë fatal i lidhur me zjarret në Utah gjatë këtij sezoni veror. Në qershor, tre zjarrfikës humbën jetën gjatë përpjekjeve për të luftuar zjarret në Knoules dhe Gore, pranë kufirit me Koloradon. Një zjarrfikës i katërt ndërroi jetë më vonë si pasojë e plagëve të marra gjatë të njëjtit incident.
Rrëzimi i helikopterit ka rikthyer vëmendjen te rreziqet e mëdha me të cilat përballen ekipet zjarrfikëse, veçanërisht në kushtet e temperaturave të larta, terrenit të vështirë dhe përhapjes së shpejtë e të paparashikueshme të zjarreve.
