Ministrja e Mbrojtjes, Mimi Kodheli është nisur për një vizitë zyrtare në Mbretërinë e Arabisë Saudite me ftesë të zëvendësprincit të Kurorës, zëvendës i dytë i kryetarit të Këshillit të Ministrave dhe ministër i Mbrojtjes, lartësisë së tij mbretërore, Muhammad bin Salman bin Abdulaziz Al-Saud.
Gjatë vizitës në Riad, ministrja do të takohet me homologun Muhammad bin Salman bin Abdulaziz Al-Saud, me të cilin pritet të diskutojë tema që kanë të bëjnë me ekstremizmin e dhunshëm dhe terrorizmin. Dy ministrat e Mbrojtjes së dy vendeve anëtare të Koalicionit Global kundër Daesh (ISIS) pritet të diskutojnë edhe për rrezikun dhe kërcënimet që vijnë prej tij. Pjesë e diskutimeve pritet të jetë edhe ngritja në Shqipëri e Qendrës së Ekselencës së NATO-s për studimin e këtij fenomeni.
Në këtë takim pritet të diskutohen gjithashtu tema që kanë të bëjnë me konfliktin në Siri dhe krizën e refugjatëve.
Gjatë qëndrimit të saj në Mbretërinë e Arabisë Saudite, ministrja Kodheli do të vizitojë struktura të ndryshme ushtarake dhe disa të tjera që lidhen me sigurinë./a.k
