Tensionet mes Turqisë dhe Greqisë duket se nuk kanë ndërmend të minimizohen, sidomos pas deklaratës të bërë së fundi nga Ankaraja.
Mediat greke e kanë cilësuar si aspak të përshtatshme deklaratën e saj, ku thotë se Imia është territor turk.
“Imia, ujërat rreth tyre dhe hapësira ajrore mbi ta janë ekskluzivisht nën sovranitetin turk”,citojnë mediat greke deklaratën e Ministrisë së Jashtme turke.
Sipas tyre, Turqia i ka kaluar limitet me këtë deklaratë, e cila vjen pas raportit të KE mbi kursin e pranimit të Turqisë në Bashkimin Evropian.
Por, sot ka ardhur edhe reagimi i Ministrisë së Jashtme greke, e cila ka thënë se “Sovraniteti i Greqisë mbi Imian është i qartë dhe i padiskutueshëm sipas Traktatit të Lozanës të vitit 1923, Marrëveshjeve Italo-Turke të vitit 1932 dhe Traktatit të Parisit të vitit 1947.”
Deklarata e Ministrisë së Jashtme greke vijon, duke i kërkuar Bashkimit Evropian që t’i bëjë thirrje Turqisë për të respektuar të drejtën evropiane.
“Ajo përgjigjet me një deklaratë provokuese, duke përsëritur një qëndrim të paligjshëm, duke injoruar faktin se statusi ligjor i Egjeut është plotësisht i garantuar me të drejtën ndërkombëtare”, kështu i referohet Ministria e Jashtme greke Turqisë.
a.ç
